Тохсунньу 26 күнүгэр Боруулаах нэһилиэгин түөлбэлэрин икки ардыгар волейболга күрэх буолан ааста. Уопсайа сэттэ хамаанда туруорулунна, ол иһигэр дьахталларга — «Чэчир», «Быйаҥ», «Оһуор» түөлбэттэн уонна оскуола кыргыттарын хамаандата. Эр дьоҥҥо — «Быйаҥ», «Оһуор» түөлбэттэн уонна оскуола үөрэнээччилэрэ.
«Күүстээх киирсиилэр, сытыы оонньуулар кэннилэриттэн, эр дьоҥҥо наадалаах биир очукуону халты харбатан, «Быйаҥ» түөлбэ инникки күөҥҥэ тахсан, кыайыы өрөгөйүн тутта. Иккис бочуоттаах миэстэни «Оһуор» түөлбэ эр бэртэрэ ыллылар. 3 миэстэҕэ оскуола уолаттарын кэскиллээх хамаандата таҕыста. Дьахталларга чулуу оонньууну көрдөрөн, «Быйаҥ» түөлбэ эрэллээхтик бастаата. Иккис миэстэни «Чэчир» кэрэ аҥардара ыллылар, бу хамаандаҕа 70 саастаах спорт бэтэрээнэ Елена Сергеевна тэбис-тэҥҥэ оонньуу сылдьара хайҕаллаах. Үһүс миэстэ буолбут оскуола кыргыттарын хамаандата инникитин нэһилиэктэрин аатын ааттатыахтара диэн бигэ эрэллээхпит. Элбэх ыалдьааччы кэлэн оонньуу хаамыытын сытыырхаттылар, сэргэхситтилэр. Тэрээһини иилээн-саҕалаан Владимир Владимирович Слепцов уонна Афанасий Христофорович Слепцов ыыттылар. Бары кыттааччыларга ситиһиилэри, чэгиэн туругу, махталы биллэрэбит!», — диэн кэпсээтэ спортинструктор А.Х. Слепцов.