Дойдубут үрдүнэн Улуу кыайыы 80 сылын көрсө, В.В.Путин уурааҕынан, үүммүт сыл Аҕа дойдуну көмүскээччи сыла.
Бу мээнэҕэ буолбатах, Украина сиригэр 2022 сыл олунньу ыйыттан улахан хаан тохтуулаах кыргыһыы бара турар. Киэҥ нэлэмэн Арассыыйа араас муннуктарыттан ким бэбиэскэнэн, ким көҥүл өттүнэн Анал байыаннай дьайыыга кыттыһан барбыта. Ол сыл күһүнүгэр Саха сирин араас улуустарыттан хомуйуу, мобилизация ыҥырыы саҕаламмыта. Олор истэригэр биир бастакынан бэбиэскэни Боруулаах эр хоһууна Сергей Иннокентьевич Юмшанов туппута. Кини бу кэмҥэ Чурапчы сиригэр үлэлии- хамсыы сылдьара.
Бүгүн Боруулаахпыт сынньалаҥ киинигэр биир дойдулаахпыт Сергей Юмшанов сырдык аатыгар «Хотугу тиит» өйдөбүнньүк-ахтыы киэһэни олохтоох бибилэтиэкэр Жанна Слепцова иилээн-саҕалаан ыытта. Көрсүһүүгэ Сэргэй маҥнайгы учуутала Надежда Дмитриевна Юмшанова, үөлээннээҕэ, доҕоро Илья Николаевич Попов кыттыыны ыллылар.
Надежда Дмитриевна олус иһирэх, уйаҕас ахтыы оҥорон, барыбытын уйадытта. Харахпытыгар күлэн мытырыллыбыт кыра Сөрүөскэ көстөн кэллэ. Бииргэ үөрэммиттэрэ араас сирдэртэн сүрдээх истиҥ ахтыылары ыыппыттарын учууталлара ааҕан иһитиннэрдэ. Салгыы тылы Илья Николаевич ылан, оҕо саас чаҕылхай, умнуллубат оскуолатааҕы кэмнэрин сэргэхтик сэһэргээтэ.
Бу тэрээһиммит чуолаан орто уонна улахан кылаас үөрэнээччилэригэр анаммыта. Кэнчээри ыччат дойдутун историятын, маннык үтүө дьонноох эбиппит диэн биллинэр, көрдүнэр, иҺиттинэр диэн. Сүрдээх элбэх оҕо дьон кэлбитэ хайҕаллаах. Салгыы «Саха» НКИХ «Дойдубут туһугар» биэриитин иһинэн уһуллубут Сергей Иннокентьевичка аналлаах «Эппит тылын энчирэппэккэ» таһаарыытын көрдөрдүбүт. Бары да уйадыйа, киэн тутта көрдүбүт.
Сергей Юмшанов сырдык аата чугас дьонугар, доҕотторугар, биир дойдулаахтарыгар, Саха сирин дьонугар өлбөт-сүппэт өйдөбүл, үтүө холобур буола сылдьыаҕа.
Элбэх саха ыччата, эр хоһууна бу кыргыһыыга кытта сылдьар. Кинилэр хорсун быһыыларын, Ийэ дойдуларын көмүскүүр күүстээх дьулуурдарынан биһиги киэн туттабыт, кыайыынан эргиллэн кэлэллэрин эрэнэбит, кэтэһэбит!
Жанна Слепцова