Аартыка үөрэҕириигэ эйгэтин үлэһиттэрин форумун үөрүүлээхтик түмүктээһин кэнниттэн Баатаҕай орто оскуолатын спортивнай саалатыгар улуустарынан «Көрдөөх старт» эстафетаҕа уонна волейболга күрэх ыытылынна.
Анал формалаах хамаандалар бэлэмнээхтэрин илин-кэлин түсүһүүлээх спортивнай күрэх толору көрдөрдө. Комментатор судьуйаларынан Баатаҕайдааҕы оҕо спордун оскуолатын дириэктэрэ Виктор Ощепков уонна Элгэс орто оскуолатын тириэньэр-учуутала, СӨ физическэй култуураҕа уонна спортка туйгуна, «Надежда Якутии» бэлиэ хаhаайына Егор Находкин үлэлээтилэр.
Комментатор — судьуйалар күрэх хаамыытын иhитиннэрэ олордулар. «Көрдөөх стартар» эстафета түһүмэхтэригэр «Ракеткалаах сүүрүү», «Бадарааны туорааһын», «Туруоруллубут сыалга таба быраҕыы» уонна «Ханааты тардыы» киирдилэр. «Көрдөөх старт» эстафетатыгар Усуйаана хамаандата эрэллээхтик бастаата. Иккис бочуоттаах миэстэҕэ Эбээн-Бытантай улууһун хамаандата таҕыста. Олохтоох Дьааҥы хамаандата үһүс миэстэни ылла.
Волейболга Дьааҥы улууһа 1-кы миэстэни ылла, 2-кэ Усунаайа таҕыста уонна 3-с миэстэ Эбээн-Бытантай улууһугар тигистэ.
Волейбол спорда сылтан сыл ахсын сайдан, таһыма үрдээн иһэрин күрэх көрдөрдө, инникигэ элбэҕи эрэннэрдэ. Аны икки сылынан ыытыллыахтаах форумҥа күүстээх хамаандалар кэлэллэригэр бу спорт күрэҕэ эрэли үөскэттэ.
Раиса Чирикова