Дьааҥы улууhун Боруулаах нэһилиэгин сиригэр-уотугар эти-хааны чэбдигирдэр өбүгэ оонньууларын күөн түһүлгэтэ ахсынньы 2-3 күннэригэр өрө күүрүүлээхтик ыытылынна. Улуус 5 оскуолатыттан сүүмэрдэммит 22 уолан илин-кэлин түсүһэн бастыҥ аат иһин кииристилэр. Сымса, күүстээх, кыраҕы харахтаах уолаттарбыт хапсаҕай, мас тардыһыы, тутум эргиир, атах оонньуута, оҕунан ытыы, сүүрүү, ыараханы көтөҕүү көрүҥнэригэр тыҥааһыннаах хапсыһыылары, сылбырҕа туттуулары көрдөрөн успуорду сэҥээрээччилэргэ умнуллубат түгэннэри бэлэхтээтилэр.
2023 сыл – Саха сирин успуордун хамсааһынын 100 сыла уонна көҥүл тустууга олимпиада чөмпүйүөннэрин Роман Дмитриевы, Павел Пинигины, үрүҥ көмүс призерун Александр Иванову иитэлээн таһаарбыт ХХ үйэ улуу тириэнньэрэ Дмитрий Коркин төрөөбүтэ 95 сыла.
Маны санатан туран, күүстэрин-уохтарын, сатабылларын ууран үлэлэспит тириэнньэрдэргэ Илья Николаевич Поповка, Олимпий Андреевич Потаповка, Аким Акимович Акимовка, Спиридон Михайлович Старостиҥҥа, Константин Евгеньевич Юмшановка, Николай Тимофеевич Саражаковка махталбытын этэбит! Ньургун Егорович Юмшанов күрэхтэһиини саҕаланыаҕыттан бүтүөр диэри сырдатан көрөөччүлэри сэргэхситтэ. Икки күн устата саала иһэ оргуйа олордо.
Саҥа ааттар тахсалларыгар көмөлөһөр, кэлэр кэскилгэ дьоһун саҕалааһыны саҕар күрэхтэһии сүрүн спонсорынан буолла СӨ КП «Дороги Арктики» генеральнай директора В.В.Чусовскай. Бириис пуондатын үтүө санаанан хаҥатыстылар Дыгын оонньууларын кыайыылаахтара Дьокуускайтан И.П. Белолюбскай, Намтан Николай уонна Вячеслав Дьяконовтар, Дьааҥы оройуонун депутаттарын сэбиэтин бэрэссэдээтэлэ Е.В.Ноговицына, үөрэҕирии саламтатын начальнига И.С.Юмшанов, физическай култуураҕа уонна успуорка дьаһалтатын салайааччыта С.Ю. Баишев, Боруулаах нэһилиэгин дьаһалтата, нэһилиэк эр дьонун сүбэтин салайааччыта В.В.Слепцов уонна оскуола учууталлара, кылаас салайааччылара. Дьокуускай куоракка олорор биир дойдулаахпыт Христофор Потапов сүүрэн-көтөн өйөбүл буолла. «Дороги Арктики» Үөһээ Дьааҥы оройуонун филиалын директора Геннадий Потапов кыайыылаахтары чиэстээһиҥҥэ кыттыыны ылла.
Күрэхтэһии көрүҥнэринэн түмүк:
Атах оонньуута:
- 1 м. — Эверстов Станислав, Баатаҕай
- 2 м. — Чириков Петр, Адыаччы
- 3 м. — Наумов Айастаан, Боруулаах
Сүүрүү 400 м:
- 1 м. — Чириков Петр, Адыаччы
- 2 м. — Наумов Айастаан, Боруулаах
- 3 м. — Слепцов Максим, Боруулаах
Мас тардыһыы:
- 1 м. — Семенов Александр, Верхоянск
- 2 м. — Эверстов Станислав, Баатаҕай
- 3 м. — Юмшанов Арсен, Адыаччы
Тутум эргиир:
- 1 м. — Потапов Роман, Верхоянск (37 эргиир)
- 2 м. — Готовцев Василий, Табалаах
- 3 м. — Юмшанов Арсен, Адыаччы
Хапсаҕай:
- 1 м. — Семенов Александр, Верхоянскай
- 2 м. — Эверстов Станислав, Баатаҕай
- 3 м. — Божедонов Иван, Боруулаах
Ыараханы көтөҕүү:
- 1 м. — Готовцев Василий, Табалаах
- 2 м. — Юмшанов Арсен, Адыаччы
- 3 м.- Наумов Айастаан, Боруулаах.
Үөһээ Дьааҥы оройуонун «Өбүгэ онньуулара» күрэҕин муҥутуур кыайыылааҕынан буолла
- Готовцев Василий, Табалаах, бириис – 30 000 солк.
- 2 м. — Эверстов Станислав, Баатаҕай, бириис – 20 000 солк.
- 3 м. — Юмшанов Арсен, Адыаччы, бириис – 10 000 солк.
Түмүккэ тириэнньэрдэр сэргэх тэрээһин тула ырытыстылар, өбүгэ оонньууларын салгыы сайыннарыы кэскилин торумнастылар, инникитин оройуон хамаандатын сүүмэрдээн өрөспүүбүлүкэ таһымыгар кыттыыны сүбэлэстилэр. Дьааҥы улууһугар оҕолор ортолоругар өбүгэ оонньууларын күрэхтэһиитин бастакы кыттыылаахтарын, кыайыылаахтарын ааттара дорҕоонноохтук ааттанна, чиэстэннэ! Баҕарабыт ньургун уолаттарбытыгар саҥаттан саҥа ситиһиилэри, үрдүк чыпчааллары!
Кэскиллээх спортсменнарбытыгар бу күрэх улахан успуорка тирэх былаһаакканан, үрдүккэ дабайыы саҕаланыытынан буолуоҕар эрэнэ хаалабыт.
Анастасия Юмшанова