Сэтинньи ый чугаһаата да чуолаан хоту оройуонун олохтоохторугар мууска, маска киирии үлэтэ саҕаламмытынан барар. Ону бэркэ диэн билэн, өйдөөн оройуон бары да нэһилиэктэрэ болдьохтоох кэми ыһыктыбакка өрүү ылсаллар, үлэлэһэллэр, бэйэ-бэйэҕэ күүс-көмө буолаллар.
Быйыл Адыаччы нэһилиэгэр балаҕан ыйыгар саҥа баһылык Игорь Захаров талыллан үлэтин саҕалаан эрэр. Биир бастакынан баһылык быһыытынан үлэтин былааныгар киллэрбит муус ылыытын субуотунньугун биир дойдулаахтарыгар биллэрэн, нэһилиэк көхтөөх эр дьонун бииргэ муһан үрдүк таһымнаахтык тэрийдэ.
Ханнык баҕарар субуотунньуктар өрүү дьону муһары таһынан түмэринэн биһирэнэллэр. Уопсай сүбэнэн ыытыллар күнэ, ыйа бигэргэммит муус ылыытын субуотунньугар олохтоох дьаһалтаҕа бэйэ тылынан уонна суругунан киирбит сайабылыанньаларынан уопсайа 37 араас социальнай балаһыанньалаах ыал дьиэлэрин тэлгэһэтигэр тиэйилиннэ. Кинилэр истэригэр бөһүөлэккэ олорор тыыл бэтэрээннэрэ, сэрии сылларын оҕолоро, анал байыаннай дьайыы кыттыылаахтарын дьиэ кэргэттэрэ, соҕотох олорор саастаах дьон, инбэлиит дьон, ону кытта кыаммат ыал. Бу иннинэ маннык элбэх ахсааннаах ыалга муус тиэйиитин субуотунньуга нэһилиэк урукку баһылыга Вячеслав Слепцов салайыытыгар оҥоһулла сылдьыбытын дьон бэркэ өйдүүр.
Онтон бүгүҥҥү күҥҥэ нэһилиэк баһылыга Игорь Захаров салайыылаах субуотунньукка өрүү буоларын курдук В.С. Чириков аатынан Адыаччы орто оскуолатын, Адыаччытааҕы “Кэскил” оҕо уһуйаанын, Адыаччытааҕы спорт уонна култуура киинин, олохтоох дизельнай электроыстаансыйа, олохтоох дьиэҕэ-уокка коммунальнай хаһаайыстыба, олохтоох балыыһа уонна олохтоох дьаһалта эдэриттэн эмэнигэр диэри араас көлүөнэ үлэһит эр дьоно Баахыста күөлүгэр бары бииргэ мустан, биир санааҕа кэлэн көхтөөх кыттыыны ыллылар. Үгүс өттө урукку субуотунньуктарга ылсыбыт, өйөөбүт эр дьон бааллар. Сөптөөхтүк тэриллэн, былааннаммыт үлэ чаастарыгар арахсан аҥаардас 8 эрэ сүүрэр бураан көмөтүнэн үс чаас иһигэр баһаам муус таһаарылынна, тиэйилиннэ.
Бэл диэтэр олохтоохторго муус тиэйиллэн бүппүтүн кэннэ нэһилиэк тутаах тэрилтэлэригэр кытта тиэйиллэ оҕуста. Бүгүҥҥү сыананан нэһилиэк иһигэр иһэр мууска бураан биир сыарҕата – 1000 солкуобайга тэҥнэһэр. Ону кытта бөһүөлэккэ иһэр ууну водовоз сырыыта кытта хааччыйар.
Мууска тиксибит биир дойдулаахтар субуотунньук кыттыылаахтарыгар махталлара муҥура суох. Нэһилиэк социальнай ситимин бөлөхтөрүгэр бэйэ тус махталын бөһүөлэк үлэһит эр дьонун ааттаан, суруйан туран тиэрдэллэр. Инньэ гынан, нэһилиэккэ чахчы даҕаны туһалаах, суолталаах субуотунньук ыытылынна диэн бэлиэтээтэххэ бука сыыстарбаппыт буолуо.
Кыстыкка киирии саҕаламмытынан бөһүөлэктэргэ үлэ салгыы күүстээхтик, былааннаахтык барар. Өрүү бэйэ-бэйэни өйдөһөн, көмөлөһөн – түмсүүлээх буолуоххайыҥ уонна нэһилиэк күннээҕи олоҕор-дьаһаҕар инникитин да көхтөөх кыттыыны ыларгытыгар диэн олохтоох дьаһалта биир дойдулаахтарын ыҥырар.
Бөһүөлэккэ атын да хайысхаларга үлэ тохтоло суох барар. Ол курдук, сотору кэминэн Адыаччы аҕа баһылыгын чиэстээһинэ, ону кытта сэтинньи ыйтан саҕалаан түөлбэлэринэн драмаҕа күрэх-фестиваль уонна ый бүтүүтэ анал байыаннай дьайыы кыттыылааҕа Ростислав Степанов сырдык кэриэһигэр оройуоннааҕы волейбол ыытыллара күүтүллэр.
Константин Каженкин