Бу дьыл сэтинньи 6 күнүгэр Адыаччы саҥа аҕа баһылыга Игорь Захаров солотугар киириитин чиэстээһинэ буолан ааста. Санатар эбит буоллахха, балаҕан ыйын 14 күнүгэр буолан ааспыт быыбар түмүгүнэн үс хандьыдааттан баһыйар 231 (51,3%) куолаһы хомуйан, “Биир ньыгыл Арассыыйа” партиятыттан туруоруммут Игорь Николаевич Захаров мөккүөрэ суох кыайыыны ситиспитэ.
Долгутуулаах чиэстээһин күнүгэр анаан-минээн саҥа аҕа баһылыгы бары өттүнэн өйөөбүт биир дойдулаахтара, атастара-доҕотторо, чугас дьоно муһуннулар. Нэһилиэнньэ иннигэр ааспыт быыбар түмүгүн өссө биирдэ иһитиннэрэр, билиһиннэрэр түгэни нэһилиэк быыбарын хамыыһыйатын бэрэссэдээтэлэ Валентина Архипова уонна кини солбуйааччыта Саргылаана Горохова ааҕан, анал туоһу суругу туттардылар. Быыбар түмүгүнэн тахсыбыт нэһилиэк дьокутааттарын сэбиэтин тустаах быһаарыытын сэбиэт бэрэссэдээтэлин эбээһинэһин толорооччу Константин Каженкин иһитиннэрдэ. Онтон баһылык аатын сүгэр түөскэ кэтэр туоһу бэлиэни нэһилиэк урукку аҕа баһылыга Вячеслав Слепцов төрөппүт ийэтэ Елена Слепцова алҕаан туран, кэлэн кэтэрдибитэ долгутуулаах түгэнинэн буолла. Салгыы бэйэ норуотун иннигэр нэһилиэк дьаһалтатын устаабыгар илиитин ууран туран, саҥа аҕа баһылык андаҕар тылларын эттэ.
Оройуон аҕа баһылыга Владислав Иванов: «Адыаччы нэһилиэгэр үлэни-хамнаһы тэрийэн ыытыахтаахпыт. Аһаҕас боппуруос нэһилиэккэ билигин да элбэх, ол онно бары тэҥҥэ мустан үлэлээтэхпитинэ эрэ биһиги кыайыахпыт. Бириэмэ билиҥҥи кэмҥэ үлэлииргэ сүрдээх уустук буолан турар. Хас биирдии нэһилиэнньэттэн киирбит боппуруостарга араарбакка барытын ылынан, тиһэгэр тиэрдэн үлэлиэххин баҕарабын» — диэн этэн туран, эҕэрдэ суругу кытта оройуон бары 17 нэһилиэгэ гербэтэ ойуулаах чороону туттарда.
Оройуон дьокутааттарын Сэбиэтин бэрэссэдээтэлэ Екатерина Ноговицына: «Адыаччы сирэ – ытык сир. Ытык кэрэ айылҕалаах, ытык талааннаах дьонноох-сэргэлээх. Үйэлэр тухары араас хабааннаах тэрээһиннэргэ эрэ буолбакка араас күрэхтэргэ, бэстибээллэргэ хас биирдии хайысхаларыгар Адыаччы киһитэ ылсыбыт буоллаҕына, хайаан даҕаны, ураты кыайыыны ситиһэр диэн бука бары билэбит. Аны эһиги бу кэрэ айылҕаҕыт, кэрэ сиргит Туостаахтан саҕалаан бу ураты ытык хайаларгыт куруук эһигини арчылыы, араҥаччылыы турдуннар» — диэтэ уонна эҕэрдэ суругу кытта сэмэй бэлэҕин анаата.
Оройуон тыаҕа хаһаайыстыбатын салалтатын салайааччыта Кэскил Ефимова: «Мин Игорь Николаевиһы кытта уонтан тахса сыл бииргэ үлэлээн кэллим. Кини тыа хаһаайыстыбатын салалтатыгар исписэлииһинэн ситиһиилээхтик үлэлээн кэллэ. Үрдүк эппиэтинэстээх дуоһунаска талыллан, дьон итэҕэлин ылан бу дьоро киэһэтигэр турарбыттан улаханнык долгуйабын. Мин биири этиэм этэ – бэйэбит төрүт хайысхабытынан тыа хаһаайыстыбатын сайдыытыгар болҕомтотун уурарыгар. Салгыы нэһилиэк олоҕор былырыын эрэ киирбит кээпэрэтиип үлэтин байыта сүөһүнү элбэтэр туһугар үлэлииргэр баҕа санаабын этэбин», — диэн эҕэрдэлээтэ, сэмэй бэлэҕин туттарда.
Нэһилиэк ытык кырдьаҕаһа, СӨ үөрэҕириитин үтүөлээх үлэһитэ, Дьааҥы оройуонун уонна Адыаччы нэһилиэгин бочуоттаах олохтооҕо Христина Корнилова: “Инники үлэлээн испит сүрдээх үчүгэй идеялардаах биһиги эдэр баһылыкпыт Вячеслав Слепцов дьыалатын салҕааччылар, киниэхэ сүгүрүйээччилэр, кини доҕотторо-атастара ылынан, Игорь Николаевич кырдьыктыы кини үлэтин салгыахтаах. Билиҥҥи уонна урукку баһылык солбуйааччыта Саргылаана Николаевна сүрдээх элбэх саҥа көрүүлэрдээх, дьоһун темаҕа бырайыактары суруйар уонна элбэх саҥа сүүрээннэри үлэҕэ киллэрэ сатыыр салайааччы буолар. Онон, биһиги иккиэннэригэр эрэлбит улахан”, – диэн алҕаан, баҕа санаатын тиэртэ.
Чиэстээһиҥҥэ баһылык дуоһунаһыгар киирии үгэскэ кубулуйбут сиэрин-туомун, ол эбэтэр аал уоту оттон, арыылаах алаадьынан айах тутан саҥа аартыгы арыйар сыаллаах алгыһы нэһилиэк саҥа аҕа баһылыга Игорь Захаров илэ бэйэтинэн иилээтэ, саҕалаата. Ону таһынан тэрээһиҥҥэ Арассыыйа Федерациятын, Саха Өрөспүүбүлүкэтин судаарыстыбаннай, Дьааҥы оройуонун уонна Адыаччы нэһилиэгин былаахтарын кытта гиимнэрин мустубут дьон бары икки атахха туран көрүстүлэр, атаардылар уонна иһиттилэр.
Нэһилиэк иннигэр умнуллубат улахан тэрээһин бары бу киэһэ мустубут дьону бырааһынньыктааҕы остуол тула сынньалаҥ киэһэтигэр ыҥырыынан түмүктэннэ. Сынньалаҥ киэһэтигэр саҥа аҕа баһылыкка – Игорь Захаровка эҕэрдэ суруктарын кытта сэмэй бэлэхтэрин туттардылар – В.С. Чириков аатынан Адыаччы орто оскуолата, Х.Е. Корнилова аатынан Адыаччытааҕы “Кэскил” оҕо сайдар киинэ, Адыаччытааҕы Култуура уонна Спорт киинэ, Адыаччы олохтоох дьаһалтата уонна Адыаччы олохтоох балыыһата. Киэһэни иилээн-саҕалаан ыытта талааннаах ырыаһыт, оскуола учуутала Афанасий Атласов.
Ити курдук Адыаччы саҥа аҕа баһылыга Игорь Захаров нэһилиэгин иннигэр баһылык солотугар киирдэ. Хайыы үйэҕэ саҥа аҕа баһылык нэһилиэккэ, оройуоҥҥа ыытыллар үлэ былааныгар ылсан, толорон нэһилиэк бүгүҥҥү уонна сарсыҥҥы үүнэр күнүгэр, сайдыы туһугар үлэтигэр-хамнаһыгар сөптөөх суолу тобулан, кыраҕы хараҕынан таба тайанан, биир сомоҕо санааҕа барыларын түмэн саҥа хардыылары, саҥа ыллыктары олохтуоҕа, олоххо киллэриэҕэ диэн саарбахтаабакка биир дойдулаахтара эрэнэбит! Норуот инники кэскилин эрэллээхтик көрсөр сырдык оһуордаах-бичиктээх эйэҕэс санаалара элбии, үөскүү туруохтара диэн итэҕэйэбит!
Туругурдун Дьааҥыга – саҥа аҕа баһылык, туругурдун Дьааҥыга – саҥа былааннар, саҕахтар!
Константин Каженкин