Сэтинньи 8 күнүгэр Баатаҕай орто оскуолатын алын кылаастарын үөрэнээччилэригэр сүрдээх дириҥ ис хоһоонноох бырааһынньык буолан ааста.
Бу бырааһынньык күрэхтэһии быһыытынан бэйэтэ туспа суолталаах, сыаллаах-соруктаах тэриллибитэ. Тэрийээччилэр эрдэттэн былааннаан хас да түһүмэҕи наардаан балаһыанньаны кытта эрдэттэн билиһиннэрбиттэрэ.
Сүрүн сыала — хас биирдии оҕону, ыччаты, төрөппүттэри бииргэ олорор, үөрэнэр, алтыһар араас омук дьонугар убаастабыллаахтык сыһыаннаһан, бары эйэ-дэмнээхтик олорорбутугар, сомоҕолоһорбутугар, бары бииргэ тутуспутунан эйэлээхтик Ийэ дойдубутун таптаан, харыстаан уонна сайыннаран түмсэрбитигэр.
Бырааһынньыгы оскуолабыт актыбыыстара Дария Богданова уонна Марина Туприна иилээн -саҕалаан ыыттылар.
Дьүүллүүр сүбэни билиһиннэрээт норуоттар түмсүүлэрин, сомоҕолоһуу хайдах курдук күүстээҕин уонна иитэр суолталааҕын мустан олорор оҕолорго, көрөөччүлэргэ билиһиннэрдилэр. Онтон салгыы хас биирдии кылаас үөрэнээччилэрэ талан ылбыт омуктарын олоҕун, култууратын, таҥастарын, аһыыр астарын, сүрүн дьарыктарын кэпсээн-ипсээн, ыллаан-туойан, үҥкүүлээн көрдөрөн көрөөччүлэр биһирэбиллэрин ылыахтарын ыллылар. Бука бары биир тыынынан араас омук оҕолорун дохсун ытыс тыаһынан уруйдаатыбыт-айхаллаатыбыт.
Бастаан 3 «А» (сал. Л.И.Максимова) кылаас үөрэнээччилэрэ Миша Гоголев, Артём Слепцов чуваш омуктар олохторун, астарын билиһиннэрдилэр. Кинилэр ис киирбэх, имигэс кыысчааннара Руслана Вартанова чуваш үҥкүүтүн олус бэркэ толордо. Салгыы 1 «А» (сал. Т.Е. Ефимова) кылаас үөрэнээччитэ Арылхан Иванов армяннар тустарынан бэрт сэргэхтик, умсугутуулаахтык кэпсээн-ипсээн үөртэ. Маҥнайгы кылаас оҕото диэтэххэ көрөөччүлэри бэйэтигэр тардар кэскиллээх уолчаан эбит дии санаатыбыт.
3 «Б» (сал. К.Д. Потапова) кылаастар нууччалар тустарынан билиһиннэрдилэр. Кинилэр кэннилэриттэн татар омуктар таҕыстылар. Бу омуктар үҥкүүлэрин нарын-намчы Ангелина Потапова (сал. В.Н. Рязанская) олус бэркэ көрдөрдө. Татар омуктар кэннилэриттэн дагестанецтар кэллилэр. Уоллаах кыыс иккиэн 2 «Б» (сал. С.Н. Данилова) кылааска үөрэнэллэр. Эчи, таҥастара үчүгэйин, төрөппүттэрэ кыһаллан аҕай тикпиттэрэ тута көстөр.
Салгыы буряттар былаахтарын туппутунан, таҥастарын таҥныбытынан Валя Другина уонна Никита Слепцов таҕыстылар. Кинилэр 4 «Б» кылааска үөрэнэллэр (сал. О.М. Степанова). Саха омугун 1 «Б» кылаас (сал. В.П. Ощепкова) чуор куоластаах кыысчаана Амина Шокирова сахалыы ыллаан билиһиннэрдэ уонна саламаатынан күндүүлээтэ. Кинилэр кэннилэриттэн 4 «В» кылаас (сал. А.Н. Стручкова) үөрэнээччилэрэ Сайаана Данилова, Зарина Лыткина тувиннар тустарынан билиһиннэрдилэр. Манна Ариадна Слепцова тувинныы үҥкүүлээн, көрөөччүлэр дохсун ытыс тыастарынан доҕуһуолланна. Онтон 4 «А» (сал. Я.С. Горохова) кылаас уоллаах кыыһа Савелий Старостин уонна Анастасия Рожина узбек омуктары олус бэркэ билиһиннэрдилэр. Савелий олус минньигэс плову бэйэтэ астаан аҕалбытын сэҥээрдибит, хайдах астаабытын сиһилии кэпсээн, көрдөрөн барыбытын сөхтөрдө.
Дьэ, ити курдук Баатаҕай орто оскуолатыгар биир эмиэ хатыламмат бырааһынньык буолан ааста. Дьүүллүүр сүбэҕэ сыанабыл биэрэр ыарахаттарданна. Оҕо барыта кыһаллан туран бэлэмнэммиттэрин бары астынныбыт. Ол эрээри, дьүүллүүр сүбэ бэрт уһуннук быһаарсан баран, түмүктэрин биир сүбэнэн ылынан кыайыылаах кылаастары биллэрдилэр.
Сүрүн көрүҥҥэ «Омуктары көрдөрүү» түмүгэ маннык буолла: 1 миэстэ — 4 «В» кылаас, 2 миэстэ — 1 «Б» кылаас, 3 миэстэ — 4 «Б» кылаас. Салгыы «Омуктар астара» диэн түһүмэххэ дьүүллүүр сүбэ маннык түмүгү таһаарда: 1 миэстэ — 4 «А» кылаас, 2 миэстэ — 2 «А» кылаас, 3 миэстэ — 3 «А» кылаас.
Оскуолабытыгар биир улахан суолталаах тэрээһин бэрт көхтөөхтүк ааста. Араас омуктары бииргэ түмэн, сомоҕолоһууну өрө тутан бука барыбытыгар биир үтүө-кэрэ түгэни тэрийбит сүрүн салайааччыбытыгар Айаана Еремеевна Куприяноваҕа, кылаас салайааччыларыгар бука барыларыгар, төрөппүттэргэ, көмөлөһөөччүлэргэ улахан махталбытын тириэрдэбит.
Өрүү эйэлээх олох баар буоллун, өрүү сомоҕолоһуу туругура турдун!
А.Н. Стручкова,
Баатаҕай орто оскуолатын алын кылаастарын учуутала