Балаҕан ыйын 20 күнүгэр Алыһардаах учаастагар кэллиэксийэниэрдэр күннэригэр аналлаах «Ретро-музей СССР» түмэл сүрэхтэниитин тэрээһинэ үөрүүлээхтик арылынна.
Алыһардаах нэһилиэгин кэллиэксийэниэрдэрэ сэбиэскэй кэм саҕанааҕы таҥаһы кэтэн, симэнэн кэлэннэр тэрээһини киэргэттилэр. Үөрүүлээх түмэл сылаас дьиэтигэр тэрийээччилэр, ыалдьыттар уонна кыттааччылар төгүрүк остуол тула олорон ирэ-хоро кэпсэтэн, ол саҕанааҕы кэмнэри санаан аастылар.
Үйэлээҕи үксэтэр кэллиэксийэниэрдэри тэрийээччилэр уонна ыҥырыылаах ыалдьыттар эҕэрдэлээтилэр, махталларын эттилэр. Кэллиэксийэниэрдэр ким тугу мунньарын, ахсаана төһө буолбутун, хаһан уонна тоҕо муспуттарын туһунан бары биир-биир кэпсээтилэр. Сэргэх кэпсэтиилээх тэрээһин Улуу Кыайыы 80 сылыгар тэриллибитэ тэрээһин ис тиэмэтин күүскэ арыйда.
«Умнуллубат «Ретро музей СССР» тэрээһин биир үтүө түгэнинэн ыалдьыттар мусуой экспонатын хаҥата илии тутуурдаах кэлэннэр, бэлэхтэрин үөрүүлээх быһыыга-майгыга туттардылар. Онон түмэлгэ туох тиийбэтэ биллэн, ситэриллэн иһэриттэн бары да үөрдүбүт», – диир тэрийээччи Зоя Гаврильева Потапова.
Култуура тэрилтэтин былааннаах үлэтин хаамыытынан түмэл бу саас ыам ый атаҕар тэриллибит. Зоя Гаврильевна: «Алыһардааҕым дьоно-сэргэтэ урукку сэдэх маллары бэлэхтээннэр түмэл сөбүгэр туолан эрэр. Дьоммор-сэргэбэр бу үйэлээх өйдөбүнньүк буоллун диэн көмөлөспүттэригэр ис сүрэхтэн махтанабын», – диэн үөрүүтүн үллэһиннэ.
Тэрээһин биир түһүмэҕинэн Дьокуускай куораттан кэлбит Татьяна Петровна Парфенова ыалдьыттаата, дьахталларга хаппар уонна чаппараах тигэргэ үөрэттэ. Маастар кылаас хас күн ыытыллара былааннанар.
Үөрүүлээх тэрээһин сүрэхтэниитэ иһирэхтик ыытыллан дьон дуоһуйа сынньанна.
Раиса Чирикова