Биһиги ийэлээх аҕабыт Валентина Петровна (Ефимова) уонна Гаврил Гаврилович Сэмиэнэптэр эдэр эрдэхтэриттэн, өр сылларга холкуос бастыҥ үлэһиттэрэ, тыа хаьаайыстыбатын сайдыытыгар сүҥкэн кылааттаах ыанньыксыт ийэлэрин, бостуук аҕаларын көрөн-көмөлөһөн улааппыт дьон. Төрөппүттэрин үтүө холобурдарынан, ыал буолуохтарыттан, аһы-үөлү үксэтээри, кэтэх хаһаайыстыба тэриммиттэр.
Биэс оҕолоох ыал, хаһаайыстыбаларыгар ынах сүөһүнү ииттэн сибиэһэй үүт, эт аһынан хааччынар. Куурусса ииттэллэр, араас оҕуруот аьын, отон ууннэрэллэр. Оҕолорун кытта кырабытыттан, илигин сиэннэрин илдьэ, айылҕаны кытта алтыһаллар, тыа үлэтигэр сыһыаран бииргэ оттууллар, сир астыыллар.
Ийэбит сөбүлүүр дьарыга – иис. Түүлээхтэн бэргэһэ, унтуу, этэрбэс, булка кэтиллэр таҥас, сыанаҕа кэтэр көстүүм арааһын тигэр. Кылтан-сиэлтэн өрөн сэлээппэ, тюбетейка, сапсыырка, дэйбиир оҥорор. Дьиэ үлэтигэр эрэ сыстан олорбокко, нэһилиэк, оройуон араас культурнай да, спортивнай да күрэхтэригэр көхтөөхтүк кыттар, билигин ветераннар Сэбиэттэрин бэрэссэдээтэлэ.
Аҕабыт маһынан ууһанар дьоҕурдаах. Устуул, остуол, полка уонна да атын маһынан оҥоһуктары оҥорон, сөбүлүүр дьарыгынан эбии дохуот киллэрэр. Нэһилиэкпитигэр саҥа дьиэ туттар дьон аҕабыт сүбэлэрин куруук туһаналлар. Ону таһынан тыаҕа сылдьарын, айылҕалыын алтыһарын сөбүлүүр, ордук балыктыырын. Нэһилиэк общественнай, культурнай тэрээһиннэригэр кохтоохтук кыттар.
Билигин оҕолоро улаатан, уолаттар, күтүөттэр бэйэлэрэ аҕабытын кытта дьиэ туттан, төрөөбүт Табалаахпытыгар олохсуйан олоробут. Оҕолоро көлүөнэ үтүө үгэһин салҕаан, сүрүн үлэбит таһынан, бары кэтэх хаһаайыстыбалаахпыт.
Улахан кыыс Надежда Горохова олохтоох дьаьалта специалиһа, дьиэ кэргэнэ сылгы ииттэллэр. Иккис эдьиийим Наталья Колтовская Дьокуускай куоракка олорор, налоговай служба үлэһитэ. Улахан уол Семенов Василий Табалаахтааҕы культура уонна спорт киинин дириэктэрэ, урбаанньыт, нэһилиэк депутата, сылгы иитиитинэн дьарыктанар. Иккис убайым Семенов Валерий оскуола завхоһа, нэһилиэкпитигэр соҕотох килиэп буһарыытынан дьарыктанар урбаанньыт-пекарь. Уонна мин Кыра кыыстара Алевтина Семенова олохтоох дьаһалта специалиһа, сылгы ииттэбит уонна торт оҥорон, нэһилиэк дьонун үөрүүлээх түгэннэрин үксэтэбин.
Эбэлээх эһэбититтэн кэлбит үтүө үгэһи – айылҕаны кытта алтыһыыны өрө тутабыт, дьыл кэмин ахсын дьиэ кэргэнинэн хайаан да айылҕаҕа тахсан дуоһуйа сынньанабыт, оонньуубут, оттуубут, сир астыыбыт. Бары оҕолорбутун бииргэ илдьэ сылдьан, иитэн, кэпсэтэн, үөрэтэн, үлэттэн-үөрэхтэн ордон атын хайысхалары сэҥээриэхтэрин баҕарабыт.
Быйыл буолбут оройуоннааҕы Тыа хаһаайыстыбатын дьаарбаҥкатыгар дьоммут үлэлэрэ сыаналанан, «Лучший ЛПХ Верхоянского района» муҥутуур кыайыылаахтара буолбуттарыгар олус үөрдүбүт уонна киэн туттабыт.
«Тыа сиригэр олох сайдыытын тускула, төрүтэ киһи айылҕаны кытта ситимнээх буолуутугар, бэйэтин дьылҕатын кимтэн да тутулуга суох дьаһаныыга, тыа хаьаайыстыбатын өрө көтөҕүүгэ, үлэлээн-хамсаан тус бэйэтин кыаҕынан уйгулаах олоҕу оҥостор дьулууругар буолар» диэн төрөппүттэрбит сүбэлииллэр.
Алевтина Семенова, Табалаах, 2023 с.