Табалаахха оҕо саас бырааһынньыга салҕанар. Улуус дьаһалтата үүнэр көлүөнэ эргиччи сайдыылаах буоларыгар улахан болҕомтотун уурар.
Бу күннэргэ Табалаах нэһилиэгин арочнай спортивнай саалатыгар, VIII «Азия оҕолоро» спортивнай оонньуулар култуурунай бырагыраамаларын кыттыылаахтарыгар, Татьяна Анатольевна Баишева салайааччылаах «Мэндэҥэ» оҕо этно-фольклорнай ансаамбылын кыттыылаахтарын чиэстээһиҥҥэ аналлаах бэрт таһымнаах култуурунай тэрээһин ыытыллан ааста.
«Табалаах нэһилиэгэ» муниципальнай тэриллии баһылыга Анна Рожина бу киэҥ бырагыраамалаах түһүлгэни киирии эҕэрдэ тылынан арыйда. Табалаах орто оскуолатын аатыттан дириэктэр Григорий Григорьевич Горохов, төрөппүттэр ааттарыттан Алена Петровна Аммосова, Оҕо уһуйааныттан салайааччы Маргарита Васильевна Стручкова, төрөппүт кэмитиэтиттэн бэрэссэдээтэл Клавдия Гаврильевна Эверстова уонна участковай балыыһа бырааһа Наталья Михайловна Слепцова Мэндэҥэлэри истиҥ тылларынан киэн туттан туран эҕэрдэлээтилэр. Чиэстээһиҥҥэ нэһилиэк уус-уран самодеятельноһын кыттыылаахтарын ырыалара-тойуктара умнуллубат түгэни сэргэхситэ киэргэттилэр.
Ахтан аастахха, улуус дьаһалтата быйыл Саха сиригэр ыытыллыбыт «Азия оҕолоро» спортивнай оонньуулар култуурунай бырагыраамаларыгар Табалаахтан кытта барар 20 оҕо бырайыаһын биир өттүн үбүлээн, ону таһынан Табалаах нэһилиэгин олохтоох дьаһалтата өйөөн оҕолор быйылгы историческай бэлиэ тэрээһиҥҥэ кыттыыны ылан кэлбиттэрэ. Бөлөх салайааччыта Татьяна Анатольевна Баишева «Мэндэҥэ» этно-фольклорнай ансаамбыл оҕолоро ол сүҥкэн тэрээһиҥҥэ кыттыыларын туһунан маннык сырдатта: «Азия оҕолоро» спортивнай оонньуу аһыллыытыгар бэлэмнэнэрбитигэр, бастаан, Дьокуускайдааҕы медицинскэй колледж уопсайыгар олордубуппут. Онтон тэрээһин сабыллыытыгар тыа хаһаайыстыбатын техникумун уопсайыгар олорбуппут. Ити курдук ыйы быһа бэлэмнэммиппит, быыһыгар «Сосновый бор» сайыҥҥы лааҕырын арыллыытын кэнсиэригэр икки үҥкүүнэн, иккис сырыыга Арассыыйа үөрэҕириитин министиэристибэтин миниистирин солбуйааччыны көрсүһүүгэ аналлаах тэрээһиҥҥэ ыҥырыллан култуурунай бырагыраама кэнсиэригэр кыттыбыттара. Ону таһынан, Саха сирин аҕыйах ахсааннаах норуоттарын аатыттан Туймаада Ыһыаҕар «Алроса» хампаанньа түһүлгэтигэр ыҥырыллан хоту дойду үҥкүүтүн көрдөрөн, ырыатын иһитиннэрэн ытыс тыаһынан, элбэх махтал тылларынан биһирэммиттэрэ. Түмүккэ «Полярная звезда» телевизионнай күрэххэ кыттан III истиэпэннээх лауреат буолбуппут. Оҕолорбут «Азия оҕолоро» спортивнай оонньуулар култуурунай бырагыраамаларыгар уопсайа алтата баран кыттыбыт эбиттэр. Манна салайааччыларбыт уонна төрөппүттэрбит саамай улахан көмөлөөхтөр».
Татьяна Анатольевна төрөппүттэр таҥас тигиититтэн саҕалаан барыга-барытыгар өйүүр буоланнар «Мэндэҥэ» этно-фольклорнай ансаамбыл нэһилиэк, улуус, өрөспүүбүлүкэ култуурунай тэрээһиннэригэр элбэхтик кытталларын кэпсиир, сырдыкка-кэрэҕэ угуйан сирдии сылдьалларыгар махтанар.
Норуоттар икки ардыларынааҕы «Азия оҕолоро» спортивнай оонньуулар 1996 сылтан түөртүү сыл буола-буола ыытыллаллар, аҕыс сыл тохтобул кэнниттэн быйыл бэйэтин историческай дойдутугар – Саха сиригэр ыытыллыбыт тэрээһиҥҥэ Аартыка биир улахан улууһуттан – Дьааҥы дэлэгээссийэтэ көхтөөх кыттыыны ылбыта. Мэндэҥэлэр култуурунай-спортивнай түһүлгэлэргэ кыттыылара ол кинилэр инникитин өссө сайдалларыгар, үүнэллэригэр суол аһар, тосхол уурар. Уопсайа 2600 киһи, ол иһигэр 1930 спортсмен кыттыылаах улахан түһүлгэлэрдээх, култуурунай, экскурсионнай былаһааккалардаах ыалдьытымсах хоту дойду киин куоратыгар ыытыллыбыт Арассыыйа араас өрөгүйүөннэриттэн 30 хамаанда, ол иһигэр Саха сириттэн икки хамаанда кыттыылаах Норуоттар икки ардыларынааҕы «Азия оҕолоро» спортивнай оонньуулар култуурунай бырагыраамаларын кыттыылаахтара өссө да улуустарын, төрөөбүт нэһилиэктэрин ааттатта турдуннар, саҥаттан саҥа көлүөнэ Мэндэҥэлэр үүнэ-элбии турдуннар!
Раиса Чирикова