Табалаах нэһилиэгэр Арчы балаҕаныгар саҥа кинигэ сүрэхтэннэ. Учуутал, спортсмен, чөл олоҕу өрө туппут Василий Прудецкай сырдык кэриэһигэр анаммыт кинигэтин ырыттылар, көрдүлэр.
Бэс ыйын 23 күнүгэр биһиги тапталлаах күндү киһибит, амарах аҕабыт, элэккэй эһэбит, кэргэним Василий Афанасьевич Прудецкай олорон ааспыт, үөрэммит, үлэлээбит тапталлаах Дьааҥытыгар, төрөөбүт төрүт түөлбэтигэр Табалаахха кэлэн кэргэним туһунан «Сырдык суолу хаалларан» диэн өйдөбүнньүк кинигэбитин сүрэхтээтибит. Манна киэһэ 5 чаастан Нэһилиэк балаҕаныгар Василий Афанасьевиһы чахчы убаастыыр, ытыктыыр таптыыр дьонноро кэлэн тоҕуоруһа муһуннулар. Бу ахтыы дьоро киэһэтин Саргылана Христофоровна Потапова иилээн-саҕалаан ыытта. Кини салайыытынан олус истиҥ, ис дууһаттан тахсар тыллардаах долгутуулаах, иһирэх ахтыы киэһэтэ буолан ааста. Кэлбит дьоҥҥо Саргылана Христофоровна Василий Афанасьевич туһунан кэпсээтэ, ол кэннэ тылы биһиги дьиэ кэргэҥҥэ биэрбитигэр тапталлаах кэргэммэр анаабыт хоһооммун ааҕан иһитиннэрдим, кини хайдах киһи этэй диэн ахтан санаан, бу кинигэбит туох сыаллаах суруллубутун туһунан билиһиннэрдим. Кыыспыт Лена Васильевна кинигэбит хайдах суруллан, ханнык кыһаҕа бэчээттэнэн тахсыбытын туһунан кэпсээтэ, аҕатын убаастаан, кинигэни сэҥээрэн элбэх киһи кэлбиттэриттэн үөрбүтүн, махталын тириэртэ. Ийэтин кэнниттэн 6 саастаах сиэммит Диана узбекскай үҥкүүнэн кэлбит дьону эҕэрдэлээбитин сэҥээрэн, ытыс тыаһынан доҕуһуоллаатылар.
Нэһилиэкпит баһылыгын солбуйааччыта Николай Николаевич Слепцов ахтыы оҥорон биһиэхэ эҕэрдэ сурук уонна өйдөбүнньүк бэлэх туттарда. Василий бииргэ төрөөбүттэрэ, аймахтара, доҕотторо, бииргэ үөрэммит, үлэлээбит дьоно, кулууп үлэһиттэрэ, оскуола учууталлара, спортка уһуйбут оҕолоро, түөлбэбит салайааччыта, нэһилиэк ытык саастаах кырдьаҕастара кэлбиттэр. Нэһилиэк биир ытыктанар кырдьаҕаһа Артур Семенович Колосов Василий төрдүн ууһун туһунан төрөппүттэриттэн саҕалаан ахтыы оҥорон сырдатта. Ытык саастаах Екатерина Петровна Чирикова Василий туһунан олус үчүгэйдик кэпсээбитин долгуйа иһиттибит. Табалаахтааҕы ЭКЦ дириэктэрэ Василий Васильевич табаарыһынаан Василийдыын алтыспыт көрүдьүөс түгэннэрин наһаа үчүгэйдик кэпсээн, күллэртээн, сэргэхсийэн ыллыбыт. Үлэлии сылдьыбыт ДЭС коллективын аатыттан Роман Жирков Василий Афанасьевичтыын бииргэ үлэлээбит кэмнэрин кэпсээтэ. Оскуолаҕа бииргэ үөрэммит кылааһынньыктара Семен Васильевич Попов, Зоя Иннокентьевна Эверстова, Розалия Гаврильевна Чикачева Василийдыын кыра оҕо саастарыттан саҕалаан, бииргэ үөрэммит кэмнэрин уйадыйа ахтан санаан ыллылар. Өр сылларга уһуйааҥҥа сэбиэдиссэйинэн үлэлээбит Эмилия Гаврильевна Эверстова үс оҕобут кини уһуйааныгар иитиллэн тахсыбыттарын, Василийы төрөппүт быһыытынан кыһамньылааҕын аҕынна.
Үөрэппит, уһуйбут оҕолоро
Василий Афанасьевич үөрэппит, уһуйбут спортсменнара, оскуола учууталлара Дмитрий Емельянович, Ирина Христофоровна Василий Афанасьевич салалтатынан республика араас улуустарынан күрэхтэһиилэргэ сылдьыбыт, спортка алтыспыт кэмнэрин туһунан кэпсээтилэр. Василий балта Ирина убайа бииргэ төрөөбүттэрин кытары сыһыанын, оҕо саастарын санаан, истиҥник долгуйа аҕынна.
Кэлбит дьон Василий Афанасьевич олорбут олоҕун, үлэтин-хамнаһын, кинини кытары алтыспыт түгэннэрин сүрдээх иһирэхтик ахтан санаан аастылар. Василий Афанасьевич ыллыктаах тыллаах-өстөөх, туруорсуулаах, дойдута сайдарыгар ис дууһатынан ыалдьар, Табалаахпыт биир чаҕылхай киһитэ этэ диэн өйдүүллэр, саныыллар эбит. Оннук дойдутун дьоно кинини таптаан ааттыылларынан Бааска, дьон өйүгэр-санаатыгар, оннооҕор кыра оҕотугар тиийэ үтүө эрэ өйдөбүлү хаалларан, сүрэхтэригэр сөҥөн хаалбыт.
Презентацияҕа Василий Афанасьевиһы кэриэстээн, Табалаахпыт талааннаах, биллиилээх ырыаһыттара, кэнники сылларга Василийдыын сыанаҕа элбэхтэ алтыспыт ырыаһыттарбыт Николай Слепцов-Цой, Гаврил Титов, Светлана Слепцова, Диана Жиркова, Николай Третьяков, Евгений Борисов, уонна уһуйааччы быһыытынан үөрэтэн, бэйэтин оннутугар хаалларбыт үлэһитэ эдэр ырыаһыт Валентин Ефимов кэлэн истиҥ иһирэх ырыаларын бэлэхтээннэр бу дьоро киэһээбитин киэргэтэн, ситэрэн биэрдилэр.
Киэһэбит истиҥник түмүктэннэ
Экраҥҥа аҕабыт олоҕун кэрчиктэрин кэпсиир хаартыскалара, дьиэ кэргэнэ көстө турдулар. Дьокуускайтан экстремальнай уһун айаннарга бииргэ сылдьыбыт доҕоро, бөлөх командира Виталий Егорович Миронов бу кинигэ туһунан санаатын үллэстэн, бөлөх аатыттан эҕэрдэтин видеонан тириэртэ. Чурапчыттан эдьиийбит Татьяна Николаевна Горохова уонна балтыбыт Александра Николаевна Дьячковская кинигэ туһунан, тапталлаах күтүөттэрин Василийы ахтан-санаан кэпсээбиттэрин видеонан устан ыыппыттара көрдөрүлүннүлэр.
Кинигэбитин Верхоянскайдааҕы улуус бибилэтиэкэтигэр, Табалаахтааҕы модульнай бибилэтиэкэҕэ уонна Табалаахтааҕы орто оскуола бибилэтиэкэтигэр бэлэх ууннубут. Кинигэбит сүрэхтэниитэ 4 чаас устата олорон ахтыы, кэпсэтии кэнниттэн хаартыскаҕа түһүүнэн, фуршетынан түмүктэннэ. Хас да чаас буолбутун билбэккэ да хааллыбыт, оннук интэриэһинэй, быыһыгар араас көрүдьүөс кэпсээннэрдээх, салгымтыата суох сэргэх киэһэ буолан ааспытыттан кэлбит дьон бары да сүргэбит көтөҕүллэн астынныбыт, үөрдүбүт.
Дойдутун дьоно бу кинигэ аатын курдук, биһиги Бааскабыт чахчы да сырдык суолу хаалларан бардаҕа диэн, аҕабыт, эһэбит, кэргэним Василий Афанасьевич Прудецкай туһунан «Сырдык суолу хаалларан» диэн өйдөбүнньүк кинигэбит сүрэхтэниитин түмүктээтибит. Кинигэбит сүрэхтэниитигэр биһиэхэ күүс-көмө буолбут дьоммутугар-сэргэбитигэр барыгытыгар барҕа махталбытын тириэрдэбит!
Варвара Прудецкая, Табалаах