Дьааҥы саамай уһук нэһилиэгэр, Барыласка, улуус дьаһалтатын уонна баһылыгын отчуоттуур бөлөҕүн үөрэ-көтө көрүстүлэр, — диэн иһитиннэрэр дьаһалта пресс-сулууспата. Отчуот мунньаҕын иннинэ быйыл сайын саҥа тутуллан бүппүт ФАП ( фельдшерскай — акушерскай пуун) дьиэтин үөрүүлээхтик аһыы сиэрэ-туома оҥоһулунна.
Барылас кыстаан олорор 14 ыал 28 дьонуттан, бары кэриэтэ отчуоттуур мунньахха кэллилэр. Муниципальнай статустаах дьоҕус нэһилиэк олохтоохторо улуус дьаһалтатын салайааччыларын уонна улуус баһылыга Владислав Михайлович Ивановы кытта олохторун-дьаһахтарын, кыһалҕаларын, баҕа санааларын туһунан налыччы кэпсэттилэр. Барылас олохтоохторо үгүстэрэ сааһырбыт дьон, ол да иһин элбэх боппуруос доруобуйа харыстабылыгар ананна. Мобильнай быраастар көрөр биригээдэлэрэ өссө хаһан кэлэллэрин, улуус балыыһатыттан, соцхаралтаттан эмтэнэр-сынньанар путевкалары ылыы туһунан, саҥа тутуллубут ФАП- ка исписэлиис хаһааҥҥыттан үлэлиэҕэй диэн боппуруостар этилиннилэр. Кылаабынай быраас Владимир Иннокентьевич Докторов: “ФАП үлэлэтии Сартаҥнааҕы амбулаторияҕа бэрилиннэ. Сартаҥтан Барыласка сотору-сотору баран дьону көрүҥ, билсиҥ диэн модьуйууну биэрбиппит. ФАП силигэ ситэн, оборудованиета таҥыллан,исписэлиис көстөн, быйыл толору үлэлиэ диэн эрэнэбит», — диэн быһаарда. Ону таһынан: “Исписэлиис көстөрүгэр эһиги эмиэ кыһаллыҥ, бэйэҕит оҕолоргут бааллара буолуо”, — диэн туһаайан эттэ. Исписэлиис көһүннэҕинэ, үлэлээтэҕинэ — усулуобуйа тэрийэргэ олохтоох дьаһалта кыһаныахтааҕын тоһоҕолоотуар.
Барыластар Сартаҥ оскуолатыгар үөрэнэр оҕолоро каникулларыгар дьиэлэригэр, дьонноругар кэлэн бараллара кыһалҕа буоларын таарыйдылар. Манна улуус салалтата Сартаҥ оскуолатыгар бэриллибит массыына Барылас оҕолорун каникулга дьиэлииллэрин тиэйиэхтээх диэн быһаарда.
Барылас таһыгар хостуур промышленность үлэлээн эрэринэн, иһэр уу хаачыстыбатыгар улахан сэрэхидийии баарын, үрэх уутун чинчийиини куруук бэрэбиэркэлэнэрин ирдэниллиэхтээҕин туһунан эттилэр олохтоохтор. Маныаха улуус баһылыга: “Ааспыт сылларга иһэр ууну ыраастыыр анал тэрили Адыаччы нэһилиэгэ туруорсубутугар, » Полиметалл» хампаанньа ылан биэрбит тэрилин тиксэбиппит, ону туһамматахтара, үлэлэппэтэхтэрэ. Верхоянскай куоракка көһөрбүппүтүн эмиэ сатаан үлэлэппэтилэр, мээнэ турар. Ону, баҕар, сатаан көрөн-истэн таба туһанар, туттар киһилээх буоллаххытына, Барыласка да биэриэххэ сөп», — диэн хоруйдаата.
Маны таһынан убаһаны иитиигэ улуус субсидиятын ылыыга чипирование оҥоһуллуохтааҕа, Барыласка ол сылгыга туруорар чиптар аҕалыллыбыттара этилиннэ. Барыластар «Тополинай — Прогноз — Барылас — Сартаҥ — Арыылаах — Верхоянск» туһаайыынан, сис үрдүнэн улахан суол тутуутун хаамыытын туһунан толору быһаарыы ыллылар, бырайыагы олоххо киллэриигэ үлэ саҕаламмыта сиһилии кэпсэннэ. Эмиэ, ол курдук, улууска интернет сибээс оптоволокно нөҥүө кэлиитин тула быһаарыы бэрилиннэ. Атын бары боппуруостарга, этиилэргэ барыластар улуус дьаһалтатын тутаах үлэһиттэриттэн, баһылык Владислав Ивановтан толору эппиэттэри иһиттилэр.
Отчуот мунньаҕын түмүгэр Барылас кулуубун директора Дария Петровна Стручкова: “Киин сиртэн ыраах сытар дойдубутугар, Барыласка, олорорго араас күчүмэҕэйдэр бааллар да, үчүгэйдик олоробут дии саныыбыт. Төрүт дьарыкпытын тутабыт, бэйэбит эппитинэн, үүппүтүнэн, аспытынан олоробут. Судаарыстыба, өрөспүүбүлүкэ, улуус салалтатын көрүүтүн, дьаһалын билэн олоробут. Ону бу улуус дьаһалтатын толору састааптаах отчуоттуур бөлөҕө бүгүн биһиэхэ айаннаан кэлэн, үлэлии, истэ-суруна, эппиэтии-дьаһайа олороро көрдөрөр. Бүгүн ФАП арыллыыта буолла. Улуус салалтатыгар, баһылык Владислав Михайлович Ивановка махталбын биллэрэбин, үлэлэрин үчүгэйинэн сыаналыыбын», — диэн этинии оҥорбутун, мунньахха кэлбит барыластар бары ытыс тыаһынан өйөөтүлэр. Улуус баһылыга: » Барылас олохтоохторуттан киирбит бары боппуруостар болҕомтоҕо буолуохтара. Дойдугутугар ыччаттаргытын олохтуурга кыһаныҥ. Бүгүн бастакы саҥа эбийиэги арыйдыбыт. Атын да дьаһаллар туолан иһиэхтэрэ. Сотору, олунньу ыйга, СӨ Бырабыыталыстыбатын отчуоттуур бөлөҕө кэлиэҕэ. Бу бүгүҥҥү курдук,дьоһуннук көрсөргө, кэпсэтэргэ бэлэмнэниҥ. Барыгытыгар дьолу-соргуну баҕарабын», — диэн түмүктээтэ.