Балаҕан ыйын 25 күнүгэр Дулҕалаахпыт нэһилиэгэр ЯРКБ мобильнай биригээдэ быраастара, уопсайа 11 киһи, кэлэн нэһилиэнньэни кытта ыкса ситимнээхтик үлэлээтилэр, улахан дьону көрдүлэр-иһиттилэр, саастаах дьон эмтэрин-томторун ыйан-кэрдэн биэрдилэр.
Күн-дьыл суох буолан, быраастарбыт балаҕан ыйын 26 күнүгэр көтүөхтээхтэрин, бөртөлүөт алтынньы 2 күнүгэр саҥа кэлэн, дойдуларыгар ити күн бардылар.
Мэдэссиинэ үлэһиттэрэ бу күннэр усталарыгар, графиктан төһө да хааллаллар, санааларын түһэрбэккэ, оҕолору, улахан дьону барыларын олус үчүгэйдик, өрөбүлү аахсыбакка көрөн-истэн нэһилиэкпит дьонун махталын ылыахтарын ыллылар.
Судаарыстыбаннас күнүгэр аналлаах тэрээһиҥҥэ биир дойдулаахтарбыт Саха Өрөспүүбүлүкэтин автономиятын төрүттэспит Г.С. Ефимов, Аҕа дойду сэриитин кыттыылааҕа Х.М. Слепцов-Эллэ, Дьааҥыттан бастакы норуодунай поэт Моисей Ефимов тустарынан истэн-билэн, сэргээн, «Төрөөбүт дойдугун төһө билэҕин?» блиц-оонньууга олус сэргэхтик кыттан, Хаҥалас, Мэҥэ-Хаҥалас, Кэбээйи, Дьааҥы медиктэрэ инники күөҥҥэ тахсан, биһиги үрүҥ халааттаах аанньалларбыт билиилэрэ киэҥин, дойдуларыгар бэриниилээхтэрин, олоххо актыыбынай позицияларын сөҕө-астына көрдүбүт. Өрөспүүбүлүкэ күнүгэр ыалдьыттарбытын кытта өрө көтөҕүллэн туран оһуокайдаатыбыт. Нэдиэлэ иһигэр быраастарбыт сынньалаҥнарыгар бибилэтиэкэ киинигэр сылдьан, элбэҕи аахтылар, нэһилиэк олоҕун-дьаһаҕын, историятын сэҥээрэн иһиттилэр, биллилэр. Биир күн анаан-минээн үлэлэрин сүнньүнэн «Доруобуйа — олох төрдө» диэн бары бэйэлэрин идэлэринэн араас ыарыылар уонна онтон хайдах харыстанар туһунар профилактическай бэсиэдэ ыыттылар, аныгылыы технологияны туһанан, презентация көмөтүнэн өйдөнүмтүө гына сиһилии сырдаттылар, биирдиилээн дьоҥҥо сүбэ-ама биэрдилэр, ыйытыыларга хоруйдаатылар. Ону таһынан кэлбит дьоҥҥо анаан эҕэрдэ ырыа бэлэхтээн үөртүлэр.
Биһиги сирбитин-уоппутун, айылҕабытын көрө таарыйа тэйиччи сытар үрэххэ хааман, хаста да баран кэлбиттэриттэн, уопсайынан чөл олоҕу пропагандалыыр, бэйэ доруобуйатын көрүнэр, олоххо актыыбынай позициялаах, араас улуустан төрүттээх медицинэбит үлэһиттэринэн киэн тутта, астына санаатыбыт уонна хас биирдиилэригэр айан-сырыы ыараханын аахсыбакка, дьиэни-уоту хаалларан туран эмтиир-томтуур, маннык эппиэтинэстээх уонна сыралаах үлэлээх дьоммутугар, үрүҥ халааттаах аанньалларга нэһилиэнньэни кытта ыкса ситимнээхтик үлэлэспиттэриттэн, олохтоохтор ааттарыттан дириҥ махталбытын тиэрдэбит.
Нэһилиэкпит баһылыгар Е.М. Ноговицынаҕа, амбулаториябыт салайааччытыгар О.И. Слепцовка уонна үлэ кэллэктииптэригэр кэлбит дьону көрсөн, аһатан биир санаанан үлэлэспиккитигэр махтал. Өрүү маннык түмсүүлээх буолуоҕуҥ.
С.И. Сыромятникова