Дьиэ кэргэн уона Оҕо саас сылын чэрчитинэн Боруулаахтааҕы уһуйаан иитээччилэрэ Мария Акимовна Акимова (салайааччы), Римма Юрьевна Слепцова бэлэмнэнии бөлөҕүн иитиллээччилэринээн уонна бибилэтиэкэр Жанна Матвеевна Слепцова буолан, Токуматааҕы алын сүһүөх оскуолатын-уһуйааныгар ыалдьыттаатыбыт. Дьиэлээхтэр, уһуйаан хаһаайкалара, салайааччы Валентина Семеновна Старостина, иитээччилэр Виктория Николаевна Борисова, Ирина Ивановна Шарина, и.к. Айталина Афанасьевна Новгородова, Лилиана Николаевна Клепандина, асчыт Саргылаана Семеновна, Полина Афанасьевна Чирикова ытыс үрдүгэр түһэрэн, сылаастык көрүстүлэр, дьиҥ сахалыы амтаннаах аһынан, алгыстаах алаадьынан, арыылаах саламаатынан, сылгы субайынан, бэйэ астаабыт бурдук ас эгэлгэтинэн, ымдаанынан, итии үүттээх чэйинэн, күндүлээтилэр.
Боруулаахпыт нэһилиэгин кэнчээрилэрэ, оҕо-оҕо курдук кэмчиэрийбиттэрэ ааһа охсон, бодоруһан оонньууну көҕүлүттэн туттулар, дьоллоох оҕо саас түһүлгэтин түстээтилэр. Салгыы икки нэһилиэкпит кырачааннара холбоһуктаах эриэккэс эҕэрдэлэрин, чаҕаан ырыаларын, үҥкүүлээн лыахтыы дайалларын, дьиэрэҥкэй тэбэллэрин, хомоҕой хоһооннорун астына көрдүбүт, иһиттибит.
Тосхолбут ыйыытынан бибилэтиэкэр Жанна Слепцова оҕолорго остуоруйа дьоруойдарын төһө билэллэрин тургутар интерактивнай оонньуу ыытта. Оҕолорбут икки хамаандаҕа арахсан остуоруйа дойдутун устун көччүйдүлэр, билиилэрин бигэргэттилэр, харса суох эппиэттэһэн, кустук өҥнөөх оҕуруонан очукуо ааҕыстылар, тиһэҕэр тэҥнэһэн дьиҥ доҕордуу дьоҥҥо ыарахан чэпчиирин, уустук да судургу буоларын дакаастаатылар.
Салгыы асчыт хаһаайкалар эбиэккэ ыҥырдылар, сандалы хотойорунан ас амтаннааҕынан айах туттулар. Тото-хана аһаат, оҕолор кинигэ эгэлгэтин кытта билистилэр, бөлөхтөргө арахсан кинигэ ойуутун көрдүлэр, тэттик иһитиннэриини сэҥээрдилэр, ыйытыыларга чобуотук хоруйдаатылар. Иитээччилэр төгүрүк остуол тула төбүрүөннээн олорон, оҕону иитиигэ бэйэлэрин көрүүлэрин үллэһиннилэр, санаа атастастылар, инники үлэлэрин торумнаатылар, кэскиллээҕи кэпсэттилэр. Мария Акимовна мэтэдьиичэскэй үлэҕэ туһалаах литэрэтиирэни бэлэх уунна. Валентина Семеновна ыалдьыттарга тайах муоһуттан оҥоһуллубут сиэдэрэй харысхаллары, уһуйаан логотиптаах уруучука бэлэхтээтэ.
Оҕо-аймах ордук сөбүлүүр оонньуутун, хамаанданан арахсан күрэхтэһиини иитээччилэр Римма Юрьевна, Мария Акимовна иилээн-саҕалаан ыыттылар. Дьэ, үс хамаанданан арахсан оҕолорбут араас түһүмэхтэртэн турар моһоллору туоруурга кииристилэр. Ким сымсата, булугас өйдөөҕө, эт-хаан өттүнэн сайдыбыта манна көһүннэ. Эрийсиилээх оонньуу түмүгүнэн биир хамаанда бастаата (хапытаан — Айтал Герасимов), икки хамаанда бааллара тэҥнэһэн иккис миэстэ буолан, үөрүү үктэллэннилэр (хапытааннар — Мирон Дмитриев, Марат Самсонский).
Ити курдук күммүт биллибэккэ ааста, айанныыр болдьохпут сыыйа тиийэн кэллэ, кырачааннар хомунар аакка бардылар, бары анал сүгэһэрдэрин бэринэн, тас таҥастарын таҥнар түбүгэр түстүлэр. Киһи эрэ хайгыах — оҕолортон ким да кыҥкыйдаабата, лоп-бааччы толорон, сып-сап хомунан истилэр. Массыынабыт сырылатан тиийэн кэллэ. Суоппарбыт, сырыыны-айаны айааһаабыт, улахан уопуттаах киһи — Андрей Прокопьевич Слепцов. Бары тахсан олордубут да — төрөөбүт Томторбут диэки тэптэрэ турдубут. Махтанабыт Токума сэлиэнньэтин алын сүһүөх оскуолатын уһуйаанын бары үтүө-мааны үлэһиттэригэр (сал. В.С. Чирикова) уонна суоппар Андрей Слепцовка.
Жанна Слепцова