Сомоҕолоһуу күнүн көрсө Дулҕалаах нэһилиэгэр норуот айымньытын киинин үлэһиттэрин көҕүлээһининэн, чөл олоҕу, дьиэ кэргэн бигэ туруктаах буолуутун, өбүгэ ситимин пропагандалыыр сыаллаах муус аннынан балыктааһын күрэҕэ үрдүк тэрээһиннээхтик ыытылынна. Балыктыыр сиргэ диэри кэлэ-бара тырааныспары норуот айымньытын киинин үлэһиттэрэ бэйэлэрэ хааччыйдылар.
Эр дьон, аҕалар тиийээт, дьон иттэр, сынньанар балааккатын тардан, оһоҕу тигинэччи оттон, отуу бэлэмнээн, балыктыыр ойбоннору тэһэн биэрдилэр. Эдэр ийэлэр чэй өрөн, отууга миин буһаран, толору алаадьылаах, итии астаах сандалы тардан бэлэмнээтилэр.
Старт биллэриллээтин кытта бастакы балыгы хаптаран, Анна Николаевна Слепцова А.А. Сыромятникова ИП туруорбут «Тефаль» чаанньыгын бэлэх тутта. «Саамай элбэх балык» анал ааты кыайан, норуот айымньыта туруорбут бирииһин уонна «Саамай улахан балык» номинацияҕа эмиэ бастаан М.К. Старостин ИП бирииһин ылан, элбэх оҕо аҕата Р.В. Сыромятников үөрүүтэ үрдээтэ. «Балыксыт дьиэ кэргэн» номинацияҕа элбэх оҕолоох Мария уонна Игнат Сыромятниковтар кыайан, Г.Г. Другин ИП анал бирииһин туттулар. Ангелина Власова — Слепцова дьиэ кэргэнэ олохтообут «Аарыма балыксыт» анал аакка сэртипикээти, кырдьык да, балыгы өрө туппут, байанайдаах балыксыт М.Н. Стручковка туттардылар. «Саамай көхтөөх балыксыт» анал ааты С.И. Сыромятникова ылан, В.С. Сыромятников туруорбут бирииһинэн наҕараадаланна.
Балыкка кэлэн, көх-нэм буолбут аҕам саастаах дьоммутугар, Максим Николаевичка, Егор Иннокентьевичка, Анна Николаевнаҕа, Валентина Васильевнаҕа, эдэр дьоҥҥо холобур буолан, тэрээһиҥҥэ кыттыбыккытыттан үөрэбит, эдэрдии эрчимҥитин ыһыктыбакка, өрүү үөрэ-көтө, чөл олоҕу пропагандалыы сылдьаргыт хас биирдиибитигэр үтүө холобур буоллун.
Төһө да халлаан тымныйарга бардар, балык хамсыы да илик буоллар, сылаас отуу тула кэпсэтэн, күлэн-үөрэн, күрэхтэһии үлүскэнин билэн, эдэр ийэлэр тэрийбит сылаас астаах сандалыларыгар тото-хана аһаан, быргыччы оттуллубут балааккаҕа киирэн иттэн, тэрээһиммит түмүктэнэр чааһа кэлбитин билбэккэ да хааллыбыт. Ыал аҕалара Руслан, Игнат Сыромятниковтар, эдэр ийэ Сардаана Слепцова бэйэлэрин техникаларынан барыбытын илдьэн-аҕалан олус бэркэ сырытыннардылар. Эдэр ийэлэр Мария Ильинична, Сардаана Дмитриевна, Акулина Ивановна, Маргарита Самсоновна тиийбит дьону барыбытын олус бэркэ көрөн-истэн, тэрээһини ымпыгар-чымпыгар дылы толкуйдаан, наһаа үчүгэй сынньалаҥы, айылҕаны кытта алтыһыыны, дьону сомоҕолуур ураты тэрээһини ыыппыттарыгар ис сүрэхтэн махтанабыт.
Светлана Сыромятникова