Өрөспүүбүлүкэҕэ физкультура уонна спорт хамсааһына 100 сылыгар анаан биллиилээх экстремал сүүрүк Дмитрий Николаевич Горохов араас аахсыйаларга кыттыбыт уонна тэрийбит сүүрүүлэрин кытта өрөспүүбүлүкэ күрэхтэригэр кыттыбытын кэрэһэлиир спортивнай футболкаларын быыстапкалаата. 1978 сылтан муспут бэйэтин футболкатын уопсай ахсаана 200-тэн тахсыбыт. Азия оҕолорун спортивнай оонньуулара, Манчаары оонньуулара, Тымныы полюһа сүүрүү, Улуу Кыайыыга, ону таһынан гражданскай сэриигэ анаммыт сүүрүүлэр логотиптара ойуулаах футболка быыстапката «Модун» спорт национальнай киин комплексын манежнай саалатыгар туруорулунна.
Дмитрий Николаевич төрөөбүт Дьааҥытын умнубат – ахсынньы ый орулуур тымныылаах кыһынын үгэнигэр Дьокуускай куоракка «Дьааҥы – Тымныы Полюһа» диэн аахсыйаны тэрийэн сүүрбүтэ. Кини спортивнай олоҕор – Сахатын сиригэр ыытыллыбыт спортивнай оонньуулар умуллубат факелларын уотун биир инники туппут спортсмен, экстремал сүүрүк, илин омуктар таайыллыбат таабырыннаах йогаларын хоту сир дьонугар арыйбыт чөл олоҕу көҕүлээччи быһыытынан биллэр. Саха сирин сүүрүктэрин хамаандатын тэрийэн, Улуу Новгородскай уобалас Старорусскай оройуонун босхолооһуҥҥа, Ильмень күөлгэ өстөөҕү утары хорсуннук сэриилэспит саха хайыһардьыт буойуттарын сырдык ааттарыгар, ону таһынан Тверь – Ржев – Вязьма – Брянск куораттарга умуллубат уоттаах Кыайыы факелын тутан сүүрбүттэрэ. Аҕа дойду уоттаах сэриитин дьоруойдуу сэриилэспит, харах уулаах Улуу Кыайыыны аҕалбыт саха сирин буойуттарын таас обелисктарыгар сибэкки дьөрбөтүн уурбуттара.
Былаах тэҥэ кэчигирэһэ ыйанан турар икки сүүстэн тахса футболкалар спортивнай устуоруйаларын дьон элбэх ыйытыга суох олус кэрэхсээтэ. От ыйын 17 күнүгэр НВК Саха ханаалыгар Дмитрий Горохов сэргэх быыстапкатын саха сирин дьоно сэргии көрдүлэр.
Дмитрий Николаевич быыстапкатын кэнниттэн от ыйын 16 күнүгэр Үс хатыҥ туонатыгар сүүрүктэр өрөспүүбүлүкэтээҕи ыhыахтарыгар ытык ыалдьыт быhыытынан ыҥырыллыбытын туhунан маннык кэпсээтэ:
«Ыhыахпытыгар сүүстэн тахса сүүрүк ыалдьыттаата, ыhыаҕы «СулусСпорт» салайааччыта, көҕүлээччитэ Марфа Троева кынат көмөлөhөөччүлэрин кытта тэрийэн ыытта. Сүүрүктэргэ анаммыт ыhыах аан бастакытын 2017 сыллаахха ыытыллыбыта. Бу ыhыахха сүүрүк спортсмен кыргыттар саха сайыҥҥы мааны таҥаhын кэтэн сайбаhа хаамыстылар. Халадаай, бастыҥа кэтэ сылдьаллара сайыҥҥы айылҕа фонугар олус да тупсан көhүннэ, дэлэй астаах-үөллээх сандалылаах ыhыаҕы олус киэргэттилэр. Маннык кэрэ көстүүнү Виктория Баишева уонна Любовь Слепцова видеоҕа устан, хаартыскаҕа түhэрэн умнуллубат өйдөбүнньүккэ хаалар буолла. 92 саастаах саастаах сүүрүк, ытык ыалдьыт сылаас эҕэрдэлээх тылларынан ыhыах тэрээhинин бастакы түhүмэҕин аста. Кини этэрин истэммит саастаах сүүрээччилэр өссө да эдэр эбиппит, диэн үөрэ иhиттибит»
Россия уонна Саха сирин спордун былаахтарын уонна умуллубат уоттаах факел тутуурдаах барааттаан киирии чахчы үчүгэй көстүү буолбутун, эдэр, кэскиллээх сүүрүк Владислав Кутанов алгыс сиэрин-туомун ыыппытын «уус-уран тыллаах-саҥалаах уоллаах эбиппит» диэн сэргээбиттэрин, кыргыттар халадаайдаах сүүрүүлэрэ интэриэhи тардыбытын, 50 миэтирэ иhигэр 8 араас көрүҥҥэ эстафета ыытыллыытын, «сүүрээччилэр да, көрөөччүлэр да ыhыы-хаhыы бөҕөтө буолбуттарын дуоhуйа кэпсээтэ. Ону тэнэ куобахха ыстаныылар, оҕолорго мас тардыhыы, сүүрүү күрэхтэрэ, «спортивнай дьиэ кэргэн» күрэҕэр дьон көхтөөхтүк кыттыбытын Дмитрий Николаевич үөрэ-көтө сырдатта.
Боотто АСХААРАП
Читайте также…
«Дьулуур» спартакиада кыттыылааҕа – Елена Стручкова
Параолимпийскай оонньууларга Арассыыйа хамаанда туруоран, бастаан, 1994 сыллаахха Лиллехаммере диэн сиргэ кыттыыны ылбыт. Салгыы, 1966…
«Дьулуур» спартакиадаҕа – Дьааҥылар
Аммаҕа ыытыллыбыт XIV «Дьулуур» диэн адаптивнай спорт спартакиадатыгар Дьааҥы хамаандата кытынна. Күрэххэ Саха сирин улуустарыттан, куораттарыттан уопсайа 800 тахса киһи кытынна.