Бэчээт араас үлэһиттэрин – кэрэспэдьиэннэри, суруналыыстары, эрэдээксийэ бэтэрээннэрин, юнкордары, техническэй үлэһиттэрин, фотографтарын барыларын түмэр бэлиэ күн – Арассыыйа Бэчээтин күнэ ньиргиэрдээхтик буолан ааста. Бэчээт үлэтэ урукку да, билиҥҥи да үйэҕэ олус наадалаах, уопсастыбаннай санааны үөскэтэр, сурук күүһүнэн былаас үлэтигэр ыйааһыннаах дьайыыны оҥорор үлэ буолар.
Быйылгы Бэчээт күнэ хаһыаппытыгар олус истиҥник ааста. Сылын аайы Дьокуускай куоракка ыытыллар Бэчээт күнүгэр аналлаах улахан тэрээһиҥҥэ эрэдээксийэбит кылаабынай эрэдээктэрэ Мария Макарова баран араас сэминээрдэргэ, биэчэрдэргэ кыттан кэллэ. Тохсунньу 12 күнүгэр судаарыстыбаннай уонна өрөспүүбүлүкэтээҕи таһымнаах үрдүк наҕараадалары бастыҥ суруналыыстарга туттардылар. Өрөспүүбүлүкэ суруналыыстарын СӨ цифровой сайдыыга уонна инфокоммуникационнай технологияларын миниистирэ Василий Ефимов, СӨ Бырабыыталыстыбатын бэрэссэдээтэлин солбуйааччы Анатолий Семенов, СӨ Суруналыыстарын сойууһун бэрэссэдээтэлэ Олег Марков эҕэрдэлээтилэр.
Хотугу оройуоннартан биһиги хаһыаппыт хаста да бэлиэтэнэн ылла. Ол курдук, эрэдээксийэбит икки бочуоттаах миэстэҕэ тиксэн дипломнары тутта: Аартыка улуустарыгар бүддьүөтү таһынан үбү киллэриигэ 3 миэстэҕэ таҕыстыбыт, маны таһынан SMM-таһаарыыга (телеграм, саайт, ватсап о.д.а.) ситиһиилэнэн эмиэ 3 миэстэ буолан үөрүүбүт үксээтэ.
Быйыл эрэдээксийэбит 85 сыллаах үбүлүөйэ буолар буолан хаһыаты таптааччылартан, ааҕааччылартан, үлэһиттэртэн, биир дойдулаахтарбытыттан олус элбэх истиҥ эҕэрдэ тутан өссө бүк үөрдүбүт. Уопсастыбаннай кэрэспэдьиэннэр этиилэрин, баҕа санааларын ыстатыйа нөҥүө атастастылар. Ыстатыйалартан бастыҥнарын бүгүҥҥү нүөмэр 4 балаһатыгар ааҕыаххытын сөп.
Оройуоммут баһылыга Владислав Иванов маннык эҕэрдэлээтэ:
«Дьааҥы Аартыга», «Вести Верхоянья» олохтоох хаһыаттар эрэдээксийэтин үлэһиттэрин Бэчээт күнүнэн итиитик-истиҥник эҕэрдэлиибин!
Хаһыат кэллэктиибэ уонна уопсастыбаннай кэрэспэдьиэннэр уруккуттан дьыалаларыгар бэриниилээх, уопуттаах, бириинсиптээх үлэһиттэр. Кинилэр баар буолан оройуоммут уопсастыбаннай олоҕо кэмигэр сырдатыллар, үлэ-хамнас түмүгэ бары өттүттэн арылхайдык көстөр, бэлиэтэнэр. Маны таһынан, эдэр кэрэспэдьиэннэр куруһуоктарын кыттыылаахтарын эмиэ эҕэрдэлиибин уонна кинилэр ортолоругар саҥа талааннаах суруналыыстар баар буолуохтара, төрөөбүт улуустарын туһугар үлэлиэхтэрэ диэн эрэнэбин.
Дьааҥы салалтатын аатыттан уонна тус бэйэм ааппыттан эрэдээксийэҕэ, кэрэспэдьиэннэргэ, Бэчээт бэтэрээннэригэр үлэҕит иһин улахан махталбын тиэрдэбин! Өссө үрдүк ситиһиилэри, доруобуйаны, сайдыыны, дьолу-соргуну баҕарабын!»
Сахалыы хаһыат аатыттан истиҥник эҕэрдэлиэхпит уонна махтаныахпыт этэ биһигини кытта өрүү бииргэ буолар уопсастыбаннай кэрэспэдьиэннэрбитин Былатыан Эверстовы, Александр Стручкову, Илья Колесов – Сылгыһыт уолун, Галина Стручкова – Табайаананы, Константин Каженкины, Дмитрий Акимовы уонна хаһыаппытыгар өрүү суруйар, санаа атастаһар бары эрэллээх ааҕааччыларбытын! Өрүү биһигини кытта бииргэ буолуҥ! Олоххутугар дьол эрэ тосхойдун, үгүс үөрүүлэниҥ, ситиһиилэниҥ!
Хаһыаппыт бу балысханнаах куйаар ситимин кэмигэр кумааҕы быһыытынан сүппэккэ-симэлийбэккэ тирээһэ үрдүү, дьон биһирэбилин ыла турдун, хас биирдии бэчээттэммит тыл суолтата ыйааһыннаах, кырдьыктаах буоллун!
Туяра Чукрова