Дьааҥы дьоно-сэргэтэ биир дойдулааҕын Нюргуяна Чукорова диэн кимин бэркэ билэллэр. Кини сотору кэминэн бүттүүн бэйэбит дойдубутугар киэҥник биллэр, иһиллэр «Wildberries» («Вайлдберриз») куйаар ситимэ маҕаһыынын Баатаҕайга диэри сакаастаммыт атыыта-эргиэнэ кэлэн туттарыллар пуунун дьиэтэ буолуоҕа диэн соһуччу үөрүүлээх сонуну иһитиннэрдэ.
Дьааҥы дьоно-сэргэтэ биир дойдулааҕын Нюргуяна Чукорова диэн кимин бэркэ билэллэр. Ол курдук, Боруулаах нэһилиэгиттэн төрдүлээх биир дойдулаахпыт ыраатта хаһыс да сылын дьоллоох Дьокуускай куораттан араас кыра, улахан сээкэйгэ тиийэ таһаҕаһы киин сиртэн төрөөбүт оройуонун бар дьонугар хойутаппакка кэмигэр ыытыытынан дьарыктанара, үлэлиирэ чуолаан биллэр. Хайа эрэ кэмҥэ таһаҕас ыытыытыгар ылсан дьарыктанар дьон элбии сылдьыбыттара эрээри, кинилэр истэригэр Нюргуяна Семеновна аата-суола киэҥ эйгэҕэ барыларыттан ордук элбэхтэ иһиллэр. Кэлиҥҥи кэмнэргэ сүрүн үлэтин-хамнаһын ыырдара кэҥээн, тэнийэн бэйэтин кытта бииргэ үлэлэһэргэ тэриммит туспа улахан хамаандатын ситиһиилээх түбүгэр кини өҥөтүн өрүү ыйыталаһар уонна туһанар нэһилиэнньэтэ сылтан сыл ахсаана быдан элбээн, улаатан иһэр.
Биир дойдулаахтарын кытаанах эрэлин хомуйбут эдэр урбаанньыт Нюргуяна Семеновна бу эрэ сылга Баатаҕай бөһүөлэгин киин уулуссатыгар «У Нюргуяны» диэн дьиэҕэ-уокка, күннээҕи түбүккэ ордук наадалаах аска-таҥаска, араас малга-салга тиийэ хааччыллыылаах маҕаһыын арыйбыта. Ону кытта бу маҕаһыынын дьиэтигэр тиһэҕин быспакка үлэ күннэрин ахсын самолетунан көтөн кэлэр бар дьоно туттарбыт, бэйэтигэр түһэрбит сакаастарын түҥэтэр. Билэрбит курдук, инникилээх урбаанньыт биир улахан үтүө өрүтэ – бэйэтэ сатаан наадалааҕын көрдөөн булбатах эбэтэр булан ылбат дьоҥҥо анаан-минээн өрүүтүн бэйэтэ сүүрэн-көтөн булан биэрэрин дьон-сэргэ хайҕыыр уонна сэҥээрэр.
Үөһэ этиллибитинэн эрэ муҥурдаммакка урбаанньыт Нюргуяна Семеновна бастатан туран дьиэ кэргэн амарах ийэтэ, кэргэнэ буоларынан ылсар дьыалатын бастакы хардыыларыттан ыла элбэх оҕолоох дьиэ кэргэҥҥэ өрүү көмө оҥоруутун, ыытыытын хайаан да умнубат. Холобура, Табалаах нэһилиэгэр олорор биир дойдулаахтарыгар хаһаайыстыбаҕа солбуллубат иистэнэр массыынаны кытта оверлокка тиийэ атыылаһан биэрэр. Нөҥүө сылыгар элбэх оҕолоохторго кыһыҥҥы үрдүкү уонна атах таҥаһынан бэрийэр. Дулҕалаах нэһилиэгэ мотуохтуур сылыгар эмиэ кыһыҥҥы таҥаһынан-сабынан элбэх оҕолоохторго көмөтүн уунар. Саҥа Дьыл бырааһынньыгын ахсын төрөөбүт нэһилиэгин сүүстэн тахса кэриҥэ ахсаанынан оҕолоругар бырааһынньыктааҕы кэһиитин ыытар, аҥаардас бу сылга элбэх оҕолоох дьиэ кэргэнтэн 250 оҕо Табалаах, Боруулаах уонна Токума бөһүөлэктэригэр бырааһынньыктааҕы кини бэлэҕин тутан тураллар. Ону таһынан иккис дойду оҥостубут Дьокуускай куоратын тулаайах оҕолоругар эмиэ болҕомтотун ууран көмө оҥоруутун туһунан үтүө санаатын кытта ыһыктыбат. Төлөннөөх алдьархай уоттан түөрт оҕону быыһаабыт Сунтаар оройуонуттан сылдьар хорсун санаалаах уол оҕотугар саҥа велосипеды бэлэх быһыытынан туттарбыта. Дьиэ кэргэҥҥэ үтүө санаалаах көмө оҥорууну таһынан эдэр урбаанньыт бэйэбит оройуоммут Ыһыахтарын тэрээһинигэр уонна сылын аайы Дьокуускай куоракка ыытыллар Дьааҥы Ыһыахтарын бырааһынньыгар спонсорство оҥорбут, туттарбыт дьон ахсааныгар кини аата өрүү ааттанар. Урбаанньыт Нюргуяна Семеновна үтүө быһыытын-майгытын оройуон салалтата туттарбыт баһаам элбэх махтал суруктара бэркэ туоһулууллар.
Онтон бу соторутааҕыта саҥа аһыллыбыт хаһаайыстыбаннай маҕаһыын бүүс-бүтүннүү атын аадырыска көһө оҕуста. Оттон иччитэхтэммит дьиэҕэ биир дойдулаахпыт сотору кэминэн бүттүүн бэйэбит дойдубутугар киэҥник биллэр, иһиллэр «Wildberries» («Вайлдберриз») куйаар ситимэ маҕаһыынын Баатаҕайга диэри сакаастаммыт атыыта-эргиэнэ кэлэн туттарыллар пуунун дьиэтэ буолуоҕа диэн соһуччу үөрүүлээх сонуну иһитиннэрдэ.
Кылгастык кэпсиир эбит буоллахха – «Wildberries» куйаар ситимин маҕаһыына дойдубутугар 2004 сыллаахтан төрүттэммитэ биллэр. Төрүттээччилэринэн Татьяна уонна Владислав Бакальчук буолаллар. Биһиги дойдубутун таһынан аатырбыт маҕаһыын өҥөтүн Белоруссия, Казахстан, Кыргызстан, Армения, Израиль, Турция, Узбекистан уонна Азербайджан дойдуларыгар тиийэ туһаналлар, атыылаһаллар. Чуолаан Сахабыт сирэ бу маҕаһыыны эмиэ бэркэ диэн билэр, өҥөтүн улаханнык туһана олорор. Ыраатта Дьокуускай куораты таһынан ыраах, чугас да сытар оройуон дьоно-сэргэтэ Арассыыйа почтатын өҥөтүн нөҥүө хайа баҕарар нэһилиэккэ тиийэ сакаастыыр кыахтаахтара. Кэлин Арассыыйа почтата ылсыбат буолуоҕуттан ыла киин куораттарга маҕаһыыҥҥа киирбит сакаастары үллэрэр анал пууннар баар буолбуттара. Ол улахан тосту уларыйыы кэмнэригэр тыа дьоно киин куоракка эрэ дылы сакаастыахтарын сөп буолбута бэйэтинэн туспа кыһалҕаны үөскэппитэ. Ол эбэтэр киин куоракка дылы төлөнөн кэлбит сакааһы илиигэ тутарга эмиэ туспа өҥөнү туһанар наада буолан хаалбыта. Оччолорго ананан сүүрэ сылдьар биһи оройуоҥҥа диэри таһаҕас ылыытынан уонна ыытыытынан дьарыктанар дьон төрүт да суох этэ. Арай бу син ыраатта аһыллыбыт пууннарга сонун бэртээхэй усулуобуйатынан сакаас түһэрбит атыылаһааччылар илэ бэйэлэринэн тиийэн кэлэн таҥас-сап өттүгэр табаардары кэтэн, кээмэйдэнэн көрөр биитэр төрүт даҕаны миэстэтигэр кэлбит сакаастан толору аккаастанар кытта кыахтаммыттарын биһирээбиттэрэ. Ону таһынан маҕаһыын биир сүрүн уратыта диэн сакаастаммыт табаар төһө кэминэн кэлэрин, хойутуурун смартфон анал сыһыарыытын нөҥүө биллэрэ, сэрэтэ сылдьара хайҕабыллаах. Итини кытта күн ахсын кэриэтэ араас чэпчэтиилээх аахсыйалар, муҥутуур бырыһыаннаах сыана түһэриитэ буолара эмиэ дьон болҕомтотун уонна биһирэбилин ылбыта. Баһаам элбэх үтүө хаачыстыбалардаах маҕаһыын дьон-сэргэ кутун-сүрүн бэрт түргэнник сүүйэн күн бүгүнүгэр диэри бастыҥнар испииһэктэриттэн түһүөн түспэт.
Биллэн туран биһи оройуоммут киин бөһүөлэгэр арыллаары турар маҕаһыын пууна ити эрдэтээҥҥи пууннар усулуобуйаларын эмиэ барытын тутуһар. Субу тэрийии өттүгэр ылсан үлэлэһэ сылдьар урбаанньыт Нюргуяна Семеновна хайыы-үйэ арыллыахтаах пууҥҥа туспа анал үлэһиттэри була охсон үлэҕэ туттуллар оборудованиелары, таҥас кэтэн көрөр хостору о.д.а. барытын толору хааччыйар өттүгэр сыаллаах-соруктаах кыһаллар.
Биир дойдулаахпыт бэйэтэ анаан-минээн маҕаһыын тутаах дьонун кытта кэпсэтэн, күүстээхтик туруорсан уонна турунан арыллыахтаах пууна Дьааҥыбыт тыһыынчанан дьонун-сэргэтин тиһэх баҕа санаатын толороро саарбаҕа суох. Итинник үлэни өрө туппут дьонноох буоламмыт Дьааҥыбыт күннээҕи олоҕор үтүө усулуобуйалар тэриллэн бардахтарына сарсыҥҥы күммүт уруккутааҕар хайаан да тупсуо, сайдыа турдаҕа.
Туругурдун Дьааҥыга – атыы-эргиэн, туругурдун Дьааҥыга – Wildberries!
Константин Каженкин