Муус устар саҕаланыаҕыттан Баатаҕай орто оскуолатыгар «Күн » түмсүүтүн оҕолоро хас биирдии кылаастарга ыалдьыттаан, араас хайысхалаах тэрээһиннэри ыыталаан эрэллэр. Сүрүн сыаллара-соруктара — үөрэнээччилэр Ийэ тылбытыгар, дьоммутугар-сэргэбитигэр, төрөөбүт төрүт дойдубутугар тапталы иҥэрии, бэриниилээх буолуу, өрөспүүбүлүкэбит сайдыытыгар, олорон ааспыт чулуу дьонноругар сүгүрүйүү.
Ыйбыт бастакы нэдиэлэтигэр «Күн» оҕолорун түмсүүтүн саамай көхтөөх кыысчаана Алина Ерусланкина бииргэ үөрэнэр кыргыттарын кытта олоҥхо туһунан сырдатта. Салгыы өрөспүүбүлүкэбит туһунан «Мин таптыыбын Сахам сирин» диэн тиэмэҕэ викторина бэлэмнээннэр ыытан эрэллэр.
Бу күннэргэ алын кылаас оҕолоругар ыалдьыттаатылар. Хас биирдии көрсүһүү саҕаланыытыгар «Өрөгөй ырыатын» дорҕоонноохтук ааҕан иһитиннэрдилэр, ыллаан дьиэрэттилэр.Маны этэн эрдэхтэрэ — өрөгөй ырыатыттан дойдуга бэриниилээх буолууну иитии саҕаланар диэн!
Хас биирдии киһи ханна да олордор, үөрэннэр, үлэлэлээтэр — бэйэтин норуотун тылын-өһүн, култууратын, омук быһыытынан бастакынан өрө тута сылдьыахтааҕын өйдүөхтээх. Оччоҕо эрэ сайдыы суола аһыллар, өй-санаа күүһүрэр.
Өрөспүүбүлүкэбит күнүн көрсө Баатаҕай оҕолоро күн аайы Өрөгөй ырыатынан күннэрин көрсөллөр, төрөөбүт төрүт тылларынан ыллыыллар-туойаллар, тулалыыр дьоннорун-сэргэлэрин, кырдьаҕас бэтэрээннэрин, хорсун-хоодуот дьоруойдарын өрө тутан киэн тутталлар.
Уруй буоллун бэтэрээннэргэ,
Кыайыыны уһансыбыт дьоруойдарга!
Анна Стручкова, Дьааҥы улууһа