Патриотизм уонна дойдуга бэриниилээх буолуу сылыгар Елена Семеновна Неустроева төрөөбүт Токуматыгар саха балаҕанын туттарарга үс мөлүйүөн солкуобайы утары ууммутун туһунан үтүө сурах Арассыыйа киин ситимнэригэр тиийэ тарҕаммыта.
Сэрии сылын оҕото, кырдьаҕас учуутал, зоотехник идэлээх бэтэрээн көмөтүнэн, Токума учаастагын оскуола-саадын тиэргэнигэр дьону түмэр, төрүт култуураны, өбүгэ үгэһин салгыырга, үөрэтэргэ аналлаах дьиэтэ тутуллан турар.
«Быйыл Елена Семеновна баҕа санаатын ситэри олоххо киллэртэрээри, тутулла турар саха балаҕаныгар салгыы веранданы тутууга анаан, олохтоох дьаһалта счетугар 500 тыһыынча солкуобайы көһөрдө. Елена Семеновна холобура төрөөбүт дойдуга тапталын, махталын уонна кэлэр кэскилгэ эрэлин мэктиэтэ», — диэн иһитиннэрдэ Боруулаах нэһилиэгин дьаһалтатын баһылыгын солбкйааччы Анжелика Владимировна Романова.
Боотто Асхаарап