Быйыл балаҕан ыйын 14 күнүгэр буолан ааспыт быыбар күн биһиги оройуоҥҥа номнуо үс нэһилиэккэ – Дьааҥы куоратыгар, Адыаччыга уонна Элгэскэ аҕа баһылыктары таллылар. Бары билэрбит курдук, Адыаччыга быыбар ыытыллыбыт төрүөтүнэн урукку аҕа баһылык Вячеслав Вячеславович Слепцов анал байыаннай дьайыыга ытык иэһин толоро сылдьан, олоҕун толук уурбута буолар. Ити гынан нэһилиэктэртэн чуолаан Адыаччыга үс хандьытааттаах нэһилиэнньэттэн баһыйар 231 (51,3%) куолаһы “Биир ньыгыл Арассыыйа” партиятыттан туруоруммут Игорь Николаевич Захаров хомуйан кыайыыны ситистэ.
Игорь Николаевич Захаров – 1979 с.т., Адыаччыттан төрүттээх. Кини үлэҕэ бастакы хардыылара Адыаччы сопхуоһуттан саҕаламмыта. Сопхуос эстиитин кытта дьыссаакка хачыгаарынан, кэлин олохтоох дьаһалтаҕа суоппарынан, мас тиэйэр массыына үлэтигэр тиийэ бэйэтин көлөһүнүн тоҕон турардаах. Кэлин 2017 сыллаахтан оройуоннааҕы тыа хаһаайыстыбатын салалтатын анааһынынан олохтоох дьаһалта тыа хаһаайыстыбаҕа исписэлииһинэн үлэлии киирэр. Онон, чахчы нэһилиэк олоҕун-дьаһаҕын, сайдыыга үлэтин-хамнаһын этинэн-хаанынан билэн, нэһилиэк аҕа баһылыгын аатыгар тиийэ үүммүт үлэһит киһи диэтэххэ бука алҕаһаабаппыт буолуо.
Саҥа аҕа баһылык аатын сүкпүт Игорь Захаров “Дьааҥы аартыга” хаһыат ыйытыыларыгар анаан-минээн хоруйдаата.
— Игорь Николаевич, бастатан туран, буолан ааспыт быыбарга кыайыыгынан эҕэрдэ! Баһылык дуоһунаһыгар хандьытаатынан турунарга туох санаа ордук салайбытай?
— Баһылык дуоһунаһыгар син уһуннук быһаарынан баран турунуу буолбута. Бүгүн үлэлии олорор хамаанда бэйэбит инникитин төрөөбүт бөһүөлэкпитигэр эрэ буолбакка, оройуон да таһымыгар тугу эмит оҥордорбут, ситистэрбит диэн санааттан бэйэбин туруоруммутум. Ону кытта нэһилиэк урукку баһылыга, анал байыаннай дьайыы кыттыылааҕа Вячеслав Слепцов хамаандатын дьоно буоларбыт быһыытынан кини үлэтин-хамнаһын салҕыыр санаа эмиэ кэмигэр улахан оруолу оонньообута.
— Эн санааҕар, тыа сиригэр ханнык кыһалҕа ордук чорбойоруй?
— Тыа сирин дьоно буоларбыт быһыытынан нэһилиэк аайы араас кыһалҕалар бааллар, элбэхтэр. Сүрүннээн сүөһү, от-мас чааһыгар тиэйии боппуруоһун кытта уокка оттуллар мас кыһалҕатын билигин ордук чорботуом этэ. Ону таһынан нэһилиэккэ үөрэх ыытыллар дьиэлэрин туруктарыгар кыһалҕалар сытыырхайдылар.
— Кистэл буолбатах – билигин киин бөһүөлэктэргэ, куораттарга көһүү быданнаата. Ол туохтан сабыдыалланарый?
— Бу көстүү биһиэхэ эрэ буолбакка нэһилиэк аайы баар. Сүрүннээн биир кыһалҕа ордук төрөппүттэри салайар, чуолаан оҕолорго, үөрэнээччилэргэ толору хааччыллыылаах оскуола, оҕо уһуйаана суоҕа. Ону кытта нэһилиэк бүтүннүү киин хочуолунайга кыайан холбоммот төрүөтүттэн кыһыны туоруурга оттук мас кыһалҕата дьоҥҥо-сэргэҕэ тириирин аанньа, дьон көһүүтэ аҕыйыа эбит диэн саныыбын.
— Ыччаты кытта үлэ туһунан…
— Ыччакка бэйэ дьыалатын саҕалыырыгар көмө үлэтин ыытыы буолуоҕа. Оройуон, өрөспүүбүлүкэ культурнай-спортивнай тэрээһиннэргэ кыттыыны ылалларыгар көмө уонна туйгун үөрэнээччилэргэ, устудьуоннарга биир кэмнээх көмөнү көрөр үлэ эмиэ ыытыллыаҕа.
— Эн көрүүгэр Адыаччы нэһилиэгэ аны 5 сылынан хайдах буолуоҕай?
— Бэйэм көрүүбүнэн Адыаччым нэһилиэгэ биэс сыллаах былаанын үлэтин толору ситистэҕинэ бары хайысхаларга улахан уларыйыылар хайаан да киириэхтэрэ, түбүктээх тиһэҕин булуохтара диэн эрэнэбин. Нэһилиэнньэ ордук күүтэр тутуулара – оскуола-саад, иккис саҥа хочуолунай нэһилиэк күннээҕи олоҕор киирэн олохпутун тупсараллара саарбаҕа суох.
— Инники былааннар тустарынан кылгастык…
— Бастатан туран, кыстыкка бэлэмнэнии саҕаланна. Ол курдук, нэһилиэккэ от-мас, суол боппуруостара быһаарыллыахтара. Тоҥоруу кэллэ, кыһыҥҥы кэмҥэ үктэнэрбит чугаһаабытынан инники дьаһаллар чуолаан онно олоҕураллар. Номнуо сыл бүтүөр диэри нэһилиэнньэ иннигэр ыытыллар былааннар, үлэлэр бааллар. Ону дьылын-кэмин ыспакка, бириэмэтинэн тэҥҥэ баран иһэбит. Ол иһин билигин – кыстыкка бэлэмнэнии.
— Игорь Николаевич, кэпсэтииҥ иһин махтал. Саҥа дуоһунаска — инники үлэҕэр, былааннаргар ситиһиилэри.
— Түгэнинэн туһанан, бу буолбут балаҕан ыйын 14 күнүгэр Адыаччы аҕа баһылыгын быыбарыгар миигин өйөөбүт, куоластаабыт дьоммор-сэргэбэр барыларыгар улахан махталбын тиэрдэбин. Бары бииргэ сомоҕолоһон нэһилиэкпитигэр үтүө олоҕу түстүөхпүт диэн бигэ эрэллээхпин. Күүспүн-уохпун түмэн, эһиги эрэлгитин толоруом диэн мэктиэлээн тураммын нэһилиэгим сайдарыгар үгүс сүрүн соруктары туруоруннум. Иннибит диэки бары бииргэ!
Ити курдук, Игорь Николаевич Захаров баһылыктаах Адыаччыга саҥа былааннар, саҥа үлэ күннэрэ саҕаланнылар.
Константин Каженкин