Сэтинньи ый 29 күнүттэн ахсынньы ый 1 күнүгэр диэри Дьааҥы куоратын 1-кы, 2-с нүөмэрдээх уонна Боронуктааҕы «Сибэккичээн» уһуйааннарыгар кустовой сэминээр буолан ааста.
Үс күнү быһа уһуйааннар икки ардыларыгар аһаҕас дьарыктарга, аралдьыйыыларга сылдьыһан уопут атастаһыыта, методическэй көмө, иитээчччилэр бэйэлэрэ айбыт, оҥорбут оонньууларын көрдөрүүтэ, төгүрүк остуолга Федеральнай саҥа бырагыраама бэйэбит региональнай салаатыгар ордук сытыытык аһаҕас кэпсэтии, кустовой улэ барылын тула санаа атастаһыыта буолла.
Дьааҥы куорат 2 нүөмэрдээх уһуйааммытыгар Байанай ыйыгар анаммыт «Мэник куобахчааннар» кыра бөлөххө, «Аҕам бултаабыта миинньигэс, ийэм тикпитэ ичигэс» улахан бөлөххө аһаҕас аралдьыйыылары бэлэмнээн оҥордубут.
Кыра бөлөххө «Мэник куобахчааннар» аралдьыйыыга сүрүн сыала соруга – ойуур кыылларын куобаҕы уонна эһэни кытта билиһиннэрии, тас көстүүлэрин үөрэтии ньымата уонна тыл саппааһын сайыннарыы буолар. Иитээччи Раиса Слепцова уонна музыкальнай салайааччы Марианна Слепцова аралдьыйыы сүрүн сыалын олус бэркэ оҕолорго уонна атын уһуйаан иитээччилэригэр тиэртилэр, былааннарын ситистилэр.
Улахан бөлөх оҕолоругар иитээччилэр Мария Васильева, Тапталлана Слепцова бэлэмнээн «Аҕам бултаабыта миинньигэс, ийэм тикпитэ ичигэс» аралдьыйыыны ыыттылар. Сүрүн сыалынан – Саха төрүт дьарыга булт туһунан оҕолорго билиилэрин чиҥэтии, булт сиэрин-туомун салҕыы билиһиннэрии, күндү түүлээхтэн иис эгэлгэтин көрдөрүү.
Ыҥырыыбытын ылынан амарах санаалаах аҕаларбыт аралдьыйыыга кэлэн кыттыыны ылбыттара улахан хайҕабыл. Аҕаларбыт бултуохтарын иннинэ аал уот оттунан, үрүҥ ас, алаадьы өйүөтүн үллэстэннэр, табыллыы тосхойон, өттүгэр харалаах дьиэлэригэр эргиллэн кэлэллэрин кэпсээтилэр.
Платон Николаевич оҕолорго көмүс хатырыктааҕы хайдах илимнээн ылар туһунан илим тардан оҕолорго илиилэринэн туттаран хаптаран көрөн, илим тас көрүнүн кэпсээн оҕолор сэҥээриилэрин ылла. Федор Владимирович сохсо иитэр туһунан, сохсого ханнык кыыл бултанарын, сохсо албастарын аһаҕастык көрдөрөн кэпсээтэ. Олимпий Андреевич капканы хайдах иитэргэ , сэрэхтээх буоларга үөрэттэ уонна бэйэтэ кэтээн көрөн кырынаас туһунан устубут видео сюжетын оҕолорго көрдөрдө.
Оҕолор бары аҕалара кэпсээбиттэрин астына иһиттилэр, көрдүлэр. Ол барыта кинилэр өйдөрүгэр хатанан хаалбыта буолуохтаах. Бу тэрээһининэн оҕо иитиитигэр Аҕа оруолун суолтата өссө күүскэ үрдэтии буолла.
Уран тарбахтаах ийэлэр хайдахтаах курдук кэрэ көстүүлээх күндү түүлээхтэн кэрэчээн кыргыттарыгар тигэн кэтэрдэн, кырачааннар үөрүүлэрэ муҥура суох. Музыкальнай салайааччы Марианна Слепцова кылгас кэм иһигэр оҕолорго күндү түүлээҕинэн симэнэн муода хаамыытын үөрэтэн оҕолор үөрэ көтө подиумна хаамтылар,хамсаныылаах «Куобахчааннар» ырыаларын ыллаан иһитиннэрдилэр. Үс күннээх кустовой семинар үрдүк таһымнаахтык ааста.
Дьааҥы куорат №2 уһуйаан музыкальнай салайааччыта Марианна Слепцова