Хаарбах дьиэттэн көһөрүү өрөспүүбүлүкэтээҕи Бырагарааматынан үлэ салҕанар. Улуус киинигэр Баатаҕай бөһүөлэгэр икки түөртүү этээстээх элбэх кыбартыыралаах дьиэ тутуута саҕаланыахтааҕын туһунан «Баатаҕай бөһүөлэгэ» муниципальнай тэриллии дьаһалтатын баһылыгын солбуйааччы Ньургун Тулуш иһитиннэрэр.
«Бу саас үөрүүлээх быһыыга-майгыга Коммунальнай уулуссатын 6 нүөмэригэр тутуллуохтаах дьиэ сыбаайата түһэриллибитэ. Иккис дьиэ Трохачева уулуусса 6-тыгар тутуллуоҕа. Дьиэлэри уоппуттаах тутар хампаанньалар МПО «Бигэ» (дириэктэр Н.А.Слепцов) уонна ООО «Арктика» (К.А. Мартиросян) тутуохтара».
Баатаҕай бөһүөлэгэр тутуу тэтимнээхтик ыытыллар. Саха сирин автономията төрүттэниитин көрсө 2021-2022 сылларга 10 эбийиэк тутуллубута: «Доруобуйа ыллыга» – Авиапорт микрооройуонугар тахсыыга дьон сынньанан тохтоон ааһар сирэ, Баатаҕайдааҕы култуура уонна сынньалаҥ пааркатыгар спортивнай былаһаакка, пааркаҕа дьон сынньанар территориятыгар култуурунай-маассабай тэрээһиннэри ыытыыга аналлаах үрдэл, Авиапорт вокзалын территориятын болуоссатыгар «Мамонт» бааматынньыга, Баатаҕайдааҕы култуура уонна спорт киинин аччыгый саалатын, фойетын уонна фасадын өрөмүөннээһин үлэлэрэ ыытыллыбыттара.
Ону таһынан, 2021-2022 сылларга Баатаҕай бөһүөлэгин Коммунальнай, Ленин, Аммосов уулуссаларыгар түөртүү кыбартыыралаах дьиэлэр тутуллан үлэҕэ киирбиттэрэ. Үөһэ этиллибитин курдук, 2023 сыллаахха Коммунальнай уулуссатыгар 30 кыбартыыралаах дьиэ тутуута саҕаланар уонна Трохачева уулуссатыгар эмиэ элбэх кыбартыыралаах дьиэ тутуллан эһиил үлэҕэ киириэхтэрэ. Баатаҕай нэһилиэнньэтин биир саамай кыһалҕалаах ыйытыгынан өр сылларга туруорсуллубут киинтэн ситимнээх ыраас уунан хааччыйыы олоххо киирээри турар. Эмиэ биир кэтэһиилээх тутуу – элбэх функцияны толорор спортивнай комплекс тутуутун бырайыактыыр-сметнэй докумуона судаарыстыбаннай экспертизаны ааспыта.
Онон элбэх дарбыана суох, былааннаммыт тутуулар кэмигэр тутуллан олоххо киирэллэр. Тутуу ыытыллыбытын, самнайбыт бараах дьиэлэр оннуларыгар аныгы ирдэбилгэ эппиэттиир дьиэлэр мэндэспиттэрин ааһар ыалдьыт, тыа дьоно бэлиэтии көрөн хайгыыллар. Тутуу – улуус сайдыытын сиэркилэтэ.
Боотто АСХААРАП
Читайте также…
В Якутии продолжается капитальный ремонт 51 школы
Из 57 обновляемых по федеральной программе школ в 6 объектах 2-х летнего цикла работы завершены. О ходе реализации мероприятий…