Анал байыаннай дьайыыга сылдьар дьон дьиэ-кэргэттэригэр кэмиттэн-кэмигэр көмө оҥоһулла турар. Бу күннэргэ Адыаччы нэһилиэгин эр дьоно кыттыылаах субуотунньук Егор Ильич Горохов дьиэтин тэлгэһэтигэр ыытылынна. Сүүрбэттэн тахса эр дьон күрүө тиэргэнигэр баар хаптаһыннары тастылар, тимир турбалары дьаарыстаатылар уонна буору таһан тэлгэһэ сирин көннөрөн дэхсилээтилэр.
Бэтэрээн суоппар Дмитрий Винокуров, доруобуйатынан хааччахтаах инбэлиит Анатолий Чириков туора турбакка, бу да сырыыга, аахсыйа субуотунньугун үлэтигэр инники күөҥҥэ сылдьыбыттарын Валерий Стручков чуолаан бэлиэтиир, субуотунньукка тыраахтарынан сүрүн күүһү оҥорбут Николай Стручковка уонна кыттыбыт эр дьоҥҥо дьаһалта аатыттан махталын этэн туран: «Төрөөбүт дойдутун, Ийэ сирин иннигэр ытык иэһин чиэстээхтик толоро сылдьар, харахпыт далыгар улааппыт биир дойдулаахпыт этэҥҥэ кыайыы көтөллөөх эргиллэн кэллин», – диэн бар дьон уонна олохтоох дьаһалта ааттарыттан эрэлин иһитиннэрдэ.
Буойун аҕата Егор Ильич Горохов хаар түһүөн иннинэ тиэргэнэ хомуллубутугар субуотунньук кыттааччыларыгар аҕалыы истиҥ махталын тириэртэ.
Ханнык да ыар түгэннэргэ, соһуччу иэдээннэргэ сомоҕо күүс санньыарбыт санааны кыйдыыр, эрэли үөскэтэр кыахтаах. Ийэ дойдуга куттал суоһаабатын туһугар Украина сиригэр буола турар кимиилээх кыргыһыы буорах сыттаах толоонугар анал байыаннай дьайыыга кытта сылдьар Саха сирин уолаттара этэҥҥэ эргиллэн кэлэллэрин туһугар бар дьон эрэлэ кэхтибэт.
Раиса Чирикова