Инвест бырагыраамма чэрчитинэн, Сайдыыга таас оскуола-саад, Суордаахха элбэх өҥөнү оҥорор култуура киинэ тутулла тураллар.
«Модернизация первого звена здравоохранения» бырагыраамманан, Хайыһардаахха, Боронукка фельдшерскэй-акушерскай пууннар үлэҕэ киирбиттэрэ. Билигин ити бырагыраамманан, Суордаах нэһилиэгэр модульнай ФАП тутулла турар.
Үөрэҕирии систиэмэтигэр Боруулаах уонна Арыылаах орто оскуолаларыгар хапытаалынай өрөмүөннэр ыытылыннылар, быйылгыттан Баатаҕай орто оскуолатыгар өрөмүөн саҕаланна. Маны таһынан, Элгэс оскуолатын, Верхоянскай куоракка оҕо үскүүстүбэтин оскуолатын, Арыылаахтааҕы уонна Улахан-Күөл нэһилиэктэригэр култуура кииннэрин, Баатаҕайга — спортивнай саала уо.д.а. эбийиэктэр өрөмүөннэригэр, тутууга бырайыактааһын симиэтэтин докумуонугар үлэ барар.
Улуус киинигэр сыл ахсын саҥаттан саҥа дьиэ дьэндэйэр. «Хаарбах дьиэттэн дьону көһөрүү» өрөспүүбүлүкэтээҕи бырагыраамма күүскэ үлэлиир. Баатаҕайга “Коммунальнай” уулуссаҕа 1760 кубтаах, 500 квадратнай миэтирэ иэннээх 30 кыбартыыралаах дьиэ тутулла турар.
Бу тутууну «Арктика» хампаанньа (генеральнай дириэктэр — К. А. Мартиросян) сүрүннүүр. «Эбийиэк былырыын бүтэриллибитэ, ис өттүн үлэтэ оҥоһуллубута. Быйыл кулун тутар ыйтан саҕалаан, 30 киһилээх биригээдэ кэлэн, уотун ситимин тардан, дьиэ ис-тас өттүн ситэрэ сылдьабыт. Үлэбит кырааппык хаамыытынан бара турар. Киин систиэмэҕэ холбонор турбалары туруоран, ититиини киллэрэн, эбийиэги сэтинньи ыйга туттарар былааннаахпыт. Ааспыт сыл ахсынньы 23 күнүгэр бу тутулла турар дьиэ аттыгар 30 кыбартыыралаах уонна Верхоянскай куоракка 24 кыбартыыралаах дьиэлэри туппуппут», — диэн иһитиннэрдэ эбийиэк субподрядчига Кабо Хачатурян. Кини тутуу сүрүн матырыйаала кыһыҥҥы суолунан тиэллэрин, оттон бетоннааһын матырыйаала манна миэстэтигэр оҥоһулларын бэлиэтиир. Онон дьон чааһынай таас дьиэлэри монолитнай каркаастаан, ол эбэтэр тимирдээн-бетоннаан туттуохтарын сөбүн тоһоҕолоото.
Раиса Чирикова