Бэс ыйын 18 күнүгэр сарсыарда 9 чаастан Дьааҥылар 12 киһи Орджоникидзе болуоссатыгар мустаммыт Аммаҕа ыытыллар Ыһыахха, ыраах айанна, туруннубут. Чаҕылхай күннээх тыаллаах салгын айаммытын арчылаата.
Бука бары үөрэ-көтө оптуобуспутугар олорон, аргыый аҕай куорат уулуссаларын устун айаннаатыбыт. Биэрэккэ кэлэн эбэбитин күндүлээтибит, салгынын иҕэрийэн, сынньана, кэпсэтэ — ипсэтэ түстүбүт. Салайааччыларбыт Эрэл Викторович Стручков, Дария Петровна Васильева кылгастык ханна туох буолуохтааҕын, ким тугу гыныахтааҕын, туох ирдэниллэрин быһаардылар, сүбэ-ама биэрдилэр.
Айаммыт суола арыллан, алгыс ылан, күнү көрсөн, Айыылардыын алтыһан, ыллаан — туойан, үөрэн-көтөн, Олоҥхо ыһыаҕын уруйдаатахпыт-айхаллаатахпыт буолуохтун.
Айан суола тыргыллар
Дьааҥы дэлэгээссийэтэ аргыый айаннаан, туоратар сиргэ тиийэммит, эбэбитин күндүүлээн баран, өр-өтөр буолбакка биэрэк устун айаннаатыбыт. Биһигини кытта хас да оптуобус баара. Хата, айан устатын тухары Олоҥхо ыһыаҕар баран иһэр ыалдьыттар биһиги оптуобуспутугар киирэн, бэйэлэрин билиһиннэрэн, ирэ-хоро араас тиэмэлэргэ кэпсэтэн-ипсэтэн, бэрт чугастык алтыһан ыллыбыт. Өлүөнэ эбэбитин туораат, Аллараа Бэстээххэ кэлэн, бары бииргэ эйэ-дэмнээхтик эбиэттээтибит, сынньана түһээт, салгыы туруннубут. Айаннаан иһэн айылҕа кэрэтин көрөн олус диэн астынныбыт, суолбут устатын тухары сап-саһархай, хоп-хойуу алтан төбө сибэккилэр арыаллаан, нап-нарын хатыҥнар, күп-күөх бэстэр, бииртэн биир кэрэ көстүүлээх алаастар көрсөн, субуруһан истилэр. Амма сирин айылҕатын кэтээн, болҕойон одуулуу, сэргии олороммут, айаммытын билбэккэ да хааллыбыт.
Мэнэ-Хаҥалас уонна Амма кыраныыссатыгар сахалыы сайбайбыт дьиҥнээх Далбар Хотуттар кымыстаах алаадьынан көрүстүлэр. Биһигини наһаа истиҥник, үөрэ-көтө уруйдаатылар-айхаллаатылар. Хаартыскаҕа түһэрэн, алгыс тылларын анаан, айаммытын алҕыы хааллылар.
Айаммыт алгыстанан, эрэх-турах сананан, астына аҕай айаннаатыбыт. Оптуобуспутун Култуура салалтатын салайааччыта Эрэл Викторович Стручков арыаллаата. Суоппарбыт Степан Викторович Нискяев сахалыы ырыаны холбоон кэбистэ. Онон испит иһигэр бүөмнээн ыллыы-туойа Аммабытыгар тиийэн кэллибит. Аммаҕа киириибитигэр сардаана сибэккилээх бэлиэни көрөн үөрдүбүт, саҥа аллайан уруйдаатыбыт, ытыспытын таһынан суоппарбытыгар махтанныбыт. Дьэ, онтон салгыы Амма сынньалаҥ киинигэр тиийдибит. Эрэл Викторович уонна Дария Петровна Олоҥхо Ыһыаҕар кэлбит дэлэгээттэри аһатар, түһэрэр сири быһаарсаат, барыбытын Оҕо айар киинигэр илтилэр. Амматааҕы оҕо айар киинэ Ольга Иванова-Сидоркевич аатынан эбит. Киирээти кытта алаадьылаах, итии чэйдээх остуоллары бэлэмнээбиттэрин бэлиэтии көрдүбүт, салгыы Амма сирин-уотун аһаттыбыт. Хонор сирбитин булунан, малбытын хомунан, бука бары «Олоҥхо» диэн аһыыр сиргэ тиийэн минньигэстик аһаатыбыт, киин уулусса устун күүлэйдээн дьиэбитигэр кэллибит. Кэлээт таҥас-сап өтүүктэнэн, бэйэ-бэйэбитин кытта ис дууһабытыттан ирэ-хоро кэпсэтиһэн сылаабытын кыйдаан кэбистибит.
Дэлэгээттэрбит олох дьиҥнээх айылҕаттан бэриллибит талааннаах дьоннор эбит. Быыстапкаларын бэлэмнииллэринэн көрдөххө үксэ кыл оҥоһуктары аҕалбыттар. Сэлээппэҕэ сахалыы киэргэл арааһын көрөн, чахчы даҕаны Дьааҥыбыт маастардара талааннахтар, дьоҕурдаахтар да эбит диэн сөхтүбүт-махтайдыбыт.
Биһиги уус-уран тарбахтаахтарбыт быыстапкаларыгар Саха Өрөспүүбүлүкэтин норуотун маастара Раиса Афанасьевна Другина, Саха Өрөспүүбүлүкэтин уус-уран оҥоһуктарын маастара Дария Петровна Васильева, Боруулаахтан култуура бэтэрээнэ Елена Сергеевна Чирикова, Остуолбаттан Лариса Николаевна Слепцова, Адыаччы нэһилиэгиттэн тимир ууһа Николай Семёнович Стручков Дьааҥыбытын ааттатыахтара.
Олоҥхоҕо Дьааҥыбыт биир бастыҥ олоҥхоһута, Сартаҥтан төрүттээх Саргылаана Семеновна Слепцова, Сайдыыттан тартарыылаах Мария Семеновна Матаркина, тойукка Клавдия Аркадьевна Неустроева уонна Саргылана Семёновна Слепцова, чабырҕахха Боруулаах нэһилиэгиттэн Саргылаана Петровна Баишева кыттыыны ылыахтара. Олоҥхо дьоруойдарын Дьааҥыбыт хомусчута Айталина Юрьевна Забаровская хоһуйуоҕа, итиэннэ кини хомус күрэҕэр кыттыаҕа. Алгысчыт уолбут Василий Колесов, кэскиллээх ырыаһыппыт Виталий Слепцов — дэгэрэҥ ырыаҕа.
Дьэ, онон, Дьааҥыбыт дэлэгээттэригэр баҕарыаҕын ситиһиилэри, сүгүрүйүөҕүн кинилэр талааннарыгар.
Кылгастык билиһиннэрдэ Анна Стручкова, Баатаҕай