Аан дойду 44 судаарыстыбатыттан 120 дэлэгээссийэнэн 2 тыһыынчаттан тахса бизнесмен кыттыылаах Кытайга ыытыллыбыт Арассыыйа уонна Кытай «Экспо-2024» Форумҥа Саха Өрөспүүбүлүкэтиттэн ООО «Саха сиринээҕи мамонт хампаанньа» баран кыттыыны ылла.
Ол туһунан хампаанньа генеральнай дириэктэрэ Игнатий Слепцов маннык сырдатар:
«Ыам ыйын 17-21 күннэригэр Улуу Кытай уонна Модун Арассыыйа VIII төгүлүн ыытыллар атыы-эргиэн сайдыытын Форумугар тиийэн кытынныбыт, мин Дьааҥыттан. Ыам ыйын 16 күнүгэр Харбин куоракка көтөн тиийбиппит. Сарсыныгар Францияттан анаан-минээн биһигини кытта көрсө кэлбит Кытай улахан кыахтаах бизнесменын Пагы кытта көрсүһүүнү олохтоотубут. Тус бэйэбит тугунан дьарыгырарбытын кэпсээтибит, инники былааннарбытын, «Саха сиринээҕи Мамонт хампаанньа» төрүттэниэҕиттэн туох ханнык хамсааһыннары оҥорон кэлбитин туһунан билиһиннэрдибит. Түмүгэр биир уопсай санааҕа кэлэн салгыы үлэлэһэр соруктары ылынныбыт. Кэпсэтии сүрдээх ситиһиилээхтик ыытылынна. Пак эдэр саҥа үлэлээн эрэр бизнесменнары кытта үлэлэһэргэ сөбүлэҥин биллэрдэ. Үhүс күҥҥэ Форум арыллыытын Саха сирин түһүлгэтигэр Ил Дархан Айсен Сергеевиһы саха дьонун сиэринэн алгыс этэн, тойук туойан көрүстүбүт. Саха сирин туһунан интэриэһиргиир кытайдары кытары билистибит. Мин сахалыы таҥаспын кэтэн тиийбитим, ону олуһун сэргии көрдүлэр».
«Саха сиринээҕи Мамонт хампааньа» уолаттара сырдаппыттарынан — гостиница аактабай саалатыгар ыытыллыбыт көрсүһүүгэ таба муоһуттан эмп оҥоруунан дьарыктанар хампаанньаны кытта билсибиттэр. Кытай сирэ билигин да таба иитиитинэн дьарыгырар олохтоох эбэҥкилэрин ааттарын, устуоруйаларын үйэтитэр матырыйааллар, оҥоhуктар, хаартыскалар туруоруллубуттарын саха дьоно улаханнык сэргээбиттэрин этэллэр. Таба муоһуттан араас ыарыылартан эмп оҥорор Кытайга баар үс улахан хампаанньа иһигэр баар тэрилтэни кытта улахан кэпсэтии ыытыллан бииргэ үлэлэһэргэ дуогабар түһэрсиллибит.
«Кытай хампаанньата таба муоһунан эрэ буолбакка араас эмтээх отторго наадыйалларын, оттор ааттарын омуктуу суругун биэрбиттэрэ, ону дойдубутугар тиийэн, анал биологическай институтка көрдөрүөхпүт. Ону тэҥэ балыктары, Дьааҥы сылгытын этин эмиэ интэриэһиргииллэр эбит. Онон, тас дойдуга табабыт муоһа эрэ буолбакка, Дьааҥыбыт сылгытын этэ эмиэ атыыланыан сөбүн иhитиннэрбиттэрэ», – диэн Игнатий Васильевич ыллыктаах кэпсэтииттэн быһа тардан кэпсиир.
Ыам ыйын 20 күнүгэр Эмиэрикэ уонна атын дойдулартан тиийбит биллэр-көстөр бизнесменнар кыттыылаах Форумҥа хампаанньа ыҥырыылаах ыалдьыт быһыытынан сылдьыбыт. Форум сүрүн түһүлгэтинэн Аарктыка өрөгүйүөннэрин хайдах бииргэ үлэлэһэн сайыннарыахха сөбүн, онно туох уустуктар бааллара ыйыллыбытын туһунан киэҥ хоннохтоох кэпсэтии ыытыллыбыт.
Онон Аан дойду саамай тымныы уонна сылаас сирин дьоно мустан кэпсэппиттэрэ саха биир чулуу хампаанньата сайдыытыгар эрэли үөскэппитин Игнатий Слепцов үөрэ биллэрэр. Кини Форумҥа көрсөн билсибит бизнесменнэригэр бэйэтэ оҥорон таһаарбыт «Саха мүөт» хампаанньа мүөтүттэн бэлэх уунан, араас дойду бизнесменнэрэ тыйыс уһун тымныылаах хоту дойдуга ыҥырыа иитиитин туһунан истэн сөхпүттэрин этэр. Эбээтэ, норуот ырыаhыта Кустуй Маарыйа таҥалай, мурун, хабарҕа ырыаларын ыллаабытын кытай норуота сэргээн махталын эппит.
Хампаанньа уолаттара мамонт муоһун тутууга хоту сир дьоно элбэх албыннатыыны көрсүбэттэрин туһугар, миэстэтигэр тутар анал лицензиялаах тэрилтэни үлэлэтэргэ дуогабар түһэристибиттэр. Сүрүн сыаллаах кэпсэтии таһынан, саха прозатын, поэзиятын Кытай омук тылынан тылбаастаан, тас дойду киэҥ араҥатыгар таһаарар баҕа санаалаахтар эбит.
ООО «Саха сиринээҕи мамонт хампаанньа» 2019 сылтан үлэлиир, быйыл тэриллибитэ 5 сылын туолар. XIII Экспо-2024 Форумҥа кыттыы хампаанньа инники сайдыытыгар улахан кылааты аҕалыаҕа диэн уолаттар эрэллээхтэрин эттилэр.
Раиса Чирикова