Эбээн-Бытантай улууһуттан «Гарпан» народнай тыйаатыра ыалдьыттаата

Муус устар 19 күнүгэр Дьааҥы куоратыгар ураты кэрэ күн буолла. Ол курдук, Эбээн-Бытантай улууҺуттан «Гарпан» народнай тыйаатыра ыалдьыттаата.

Эдэр, талааннаах туруорааччы Айтал Слепцов, Николай Лугинов «Кустук» диэн олус сэргэх, хоту дойду уратытын, тыйыс усулуобуйатын чаҕылхайдык арыйар айымньытын итэҕэтиилээхтик туруоран көрдөрдө.

Биир дойдулаахтарбын көрөн олус үөрдүм уонна инникитин да, бу курдук, эрэллээхтик, эрчимнээхтик айа-тута дойдугутун ааттата туруҥ диэн алгыыбын!

Бу киэһэ иккис чааһыгар Саха Республикатын культуратын туйгуна, мелодист Владислав Колесов бэйэтэ айбыт ырыаларын толорон дьону-сэргэни сэргэхситтэ, ону тэҥэ Эбээн-Бытантай улууһун культуратын үлэһитэ Полина Ефимова кэрэ куолаһынан көрөөччү биһирэбилин ылыан ылла. Ону тэҥэ ырыа кэһиилээх уолаттар Александр Ефимов, Айтал Слепцов ыллам ырыаларынан көрөөччүлэр сүрэхтэрин ыллылар.

Эбээн-Бытантай национальнай улууһун культуратын , «Гарпан» народнай театрын аатыттан Айтал Слепцов Верхоянскай куорат культуратын сыантырын директорыгар Назаров Константин Валерьевичка махтал суругу уонна сэмэй бэлэх туттарда.

Константин Валерьевич харда бэлэх оҥорон олохтоох краевед А.В.Слепцова кинигэлэрин бэлэх уунна.

Онон, бүгүн Дьааҥы куоратыгар дьоро киэҺэ буолла!

Александра Дмитриевна Ефимова, Верхоянскай к.

Читайте дальше