Аммаҕа ыытыллыбыт XIV «Дьулуур» диэн адаптивнай спорт спартакиадатыгар Дьааҥы хамаандата кытынна. Күрэххэ Саха сирин улуустарыттан, куораттарыттан уопсайа 800 тахса киһи кытынна. 24 хамаанда иһигэр үһүс бөлөххө Дьааҥы улууһун хамаандата Горнай, Орто Халыма, Эдьигээн, Кэбээйи, Томпо, Уус Майа уонна Булуҥ улуустарын хамаандаларын кытта күрэстэстэ.
Өрөспүүбүлүкэ Аҕа Баһылыга Айсен Николаев доруобуйаларынан хааччахтаах дьоҥҥо улахан болҕомто уурулларын, Саха сиригэр бу олимпиада 2004 сылтан ыытылларын киэҥник сырдатан туран, бу спартакиадаҕа кыттар хас биирдии спортсмен олоххо дьулуурун, кыайыы көтөллөөҕүн бэлиэтээтэ, кыттааччыларга чаҕылхай ситиһиини баҕарарын эттэ. Арассыыйаҕа ыытыллар Параолимпийскай кэмитиэт вице-бэрэсидьиэнэ Иван Потехин Арассыыйа Бэдэрээссийэтин Параолимпиадатын кэмитиэтин бэрэсидьиэнин Павел Рожков аатыттан кыттааччылары эҕэрдэлээтэ. Амма улууһун баһылыга Степан Кузьмин бу спартакиада өрөспүүбүлүкэ баһылыга Айсен Николаев өйөөһүнүнэн ыытылларын бэлиэтээн туран бары тэрийсээччилэргэ махталын эттэ.
«Дьулуур» адаптивнай спорт спартакиадатын үөрүүлээхтик аһыы церемониятыгар Арассыыйа пауэрлифтинга чөмпүйүөнэ Айаал Данилов, Аан дойду, Дьобуруопа эр дьоҥҥо шашкаҕа, Арассыыйа шашкаҕа хас да төгүллээх чөмпүйүөнэ Александр Ефимов, Дьобуруопа уонна Аан дойду пауэрлифтинга чөмпүйүөнэ, Арассыыйаҕа чэпчэки атлетика биэс төгүллээх чөмпүйүөнэ Айаал Сивцев, остуол тенниһигэр Арассыыйа чемпионатын боруонса призерэ, «Мы вместе, Спорт» диэн норуоттар икки ардыларынааҕы комплекснай спортивнай күрэхтэр сайыҥҥы параолимпийскай оонньууларыгар остуол тенниһин боруонса призерэ Михаил Неустроев уонна Арассыыйа чемпионатын олорон волейболлааһыҥҥа боруонса призерэ, Бүтүн Арассыыйатааҕы устудьуоннар бэстибээллэрин чөмпүйүөнэ Никита Лобанов Спартакиада былааҕын стадион устун өрө тутан хаамтылар. Оттон эстафета уотун илдьиигэ биллиилээх параолимпиецтэр, Аан дойду күрэхтэрин сурдолимпиецтара, чөмпүйүөннэрэ, призердэрэ уонна кинилэр тириэнньэрдэрэ Прокопий Николаев, Алена Дмитриева, Владимир Балынец, Степанида Артахинова, Анастасия Диодорова, Василий Стрекаловскай, Петр Давыдов уонна Василий Стручков кыттыыны ыллылар. Параолимпиада спартакиадатын биир көстүүлээх түгэнинэн «Очуоһу көҥдөйдүүр тулуур» диэн театрализованнай түһүлгэ үгэс буолбут бараатыгар кыттааччылар, спорт бэтэрээннэрэ, спартакиада түһүлгэлэрин судьуйалалара хаамыстылар.
От ыйын 12-16 диэри Амма улууһун Амма сэлиэнньэтигэр ыытыллыбыт «Дьулуур» спорт адаптивнай көрүҥнэрин XIV спартакиадатын түмүгүнэн бастыҥтан бастыҥнар, кыайыылаахтар ааттаннылар, уопсайа 81 кэмпилиэк мэтээл оонньонно: Киин улуустарга элбэх очукуону ылан Дьокуускай куорат, 2-кэ Мэҥэ Хаҥалас, 3-кэ Бүлүү оройуоннара бастаатылар. Иккис бөлөххө: 1-кы миэстэҕэ Ньурба, 2-кэ Үөһээ Бүлүү, 3-кэ Амма улууһа таҕыстылар. Оттон үһүс бөлөххө (кэлин спортка Аартыка улуустарыгар эбии киллэриллибит икки улууһу кытта аахтахха) түмүк маннык: 1-кы миэстэҕэ Горнай улууһа, 2 -кэ Орто Халыма, 3-кэ Эдьигээн үс бастакы миэстэ хаһаайыннарын аатын сүктүлэр. Салгыы, очукуонан ааҕыынан – Кэбээйи, Томпо, Дьааҥы, Уус-Майа, Булуҥ улуустара кэккэлэстилэр. Спорт адаптивнай көрүҥнэрин XV спартакиада Бүлүү улууһугар ыытарын иһитиннэрдилэр.
Боотто АСХААРАП
