Бу дьыл, олунньу 25 күнугэр Горнай улууһун Маҕарас нэһилиэгэр түргэн наартаҕа өрөспүүбүлүкэ аһаҕас первенствота Манчаары Баһылай спорткомплекс бирииһигэр ыытылынна. Уопсайа 7 улуус хамаандата 68 кыттааччы кытынна. Дьааҥыттан 5 уол, Табалаах орто оскуолатын үөрэнээччилэрэ кытыннылар. Уолаттарым ситиһиилээхтик күрэхтэстилэр, ол күрдүк, 9 уонна онтон кыра саастаах уолаттарга 3 кылаас үөрэнээччитэ Потапов Айуран 300 наартаны ойон эрэллээхтик чемпион үрдүк аатын ылла. Салгыы 10 — 11 саастаах уолаттарга 5 кылаас үөрэнээччитэ Стручков Павел 305 наартаны ойон эрэллээхтик бастаата, иккис миэстэни 283 наартаны ойон 3 кылаас үөрэнээччитэ Эверстов Давид ылары ситистэ. Инньэ гынан, быйылгы күрэхтэһиилэрбитин олус ситиһиилээхтик саҕалаатыбыт.
Салгыы олунньу ый 28 — кулун тутар 3 күннэригэр Саха Өрөспүүбүлүкэтин хотугу многоборьеҕа первенствота Таатта улууһун Уус Таатта нэһилиэгэр 21 улуус хамаандата, 178 кыттааччы, 27 бэрэстэбиитэл уонна тренер кыттыылаах олус үрдүк таьымннаах күрэхтэһии ыытылынна. Санатан эттэххэ, бу күрэхтэһии оҕолорго хотугу многоборьеҕа саамай улахан күрэхтэһии буолар. Дьааҥы хамаандата 10 оҕону кытыннардыбыт. Ол күрдүк, хамаандабытыгар Табалаах орто оскуолатын физкультураҕа учуутала Слепцова Ирина Христофоровна иитиллээччилэрэ эбиллэн биэрдилэр. Кыра саастаах оҕолорго үс көрүҥ (хотугулуу үстэ төхтүрүйэн ыстаныы, ураҕастаах сүүрүү, наартаны нөҥүө ойуу), орто уонна улахан саастаах оҕолорго биэс көрүҥ (хотугулуу устэ төхтүрүйэн ыстаныы, ураҕастаах сүүрүү, наартаны нөҥүө ойуу, маамыктаны уонна сүгэни быраҕыы) бааллар. Бастакы көрүҥҥэ хотугулуу устэ төхтүрүйэн ыстаныыга оҕолорбут ситиһиилээхтик кытыннылар. Ол күрдүк, Стручков Павел 11 саастаах уонна онтон кыра саастаах уолаттарга 6 м 47 см ыстанан 2 миэстэни ылары ситистэ. Салгыы 14 — 15 саастаах кыргыттарга Семенова Карина 6 м 68 см ыстанан эрэллээхтик 2 миэстэҕэ та5ыста. 12-13 саастаах кыргыттарга Семенова Анджелина 6.14 см ыстанан 5 миэстэни ылла. Иккис көрүҥҥэ сүүрүүгэ, Стручков Павел 1 сөкүүндэнэн хаалан абалаахтык 4 миэстэ буолла. Юмшанова Юлиана 14-15 саастаах кыргыттарга 2 км сүүрүүгэ 5 миэстэ буолан куһаҕана суохтук түмүктээтэ. Үһүс көрүҥҥэ, сүгэни быраҕыыга Семенова Анджелина 4 миэстэ, Слепцова Мария 14-15 саастаах кыргыттарга 6 миэстэ буолары ситистилэр. Төрдүс көрүҥҥэ, маамыктаны ураҕаска быраҕыы көрүҥҥэ, оҕолорбут маамыктаны киллэрбэтилэр. Санатан эттэххэ, былырыын бу көрүҥҥэ икки мэтээли ылбыппыт. Күрэхтэһиибит бүтэһик уонна саамай ыарахан көрүҥэр, наартаны нөҥүө ойууга Эверстов Давид 11 уонна онтон кыра саастаах уолаттарга 140 наартаны ойон 3 миэстэни ылан хамаандабытыгар үһүс мэтээли аҕалан үөртэ. Кыра уолаттарга, үс көрүҥ түмүгүнэн Стручков Павел 16 очукуолаах 3 миэстэҕэ эрэллээхтик таҕыста уонна бу күрэхтэһиигэ Дьааҥы хамаандатыгар саамай улахан ситиһии буолла.
Бу күрэхтэһии кэмигэр, биир дойдулаахпыт, Ил Тумэн дьокутаата Сергей Сивцев Саха Өрөспүүбүлүкэтин хотугу многоборьеҕа федерациятын президенинэн ананна. Дьааҥыбытыгар, бу көрүҥҥэ федерация тэриллэн, салгыы сайдарыгар күүс-көмө буолуо диэн эрэллээхпит.
Салгыы, кулун тутар ый 7 күнугэр Дьокуускай куорат ДЮСШ 1 саалатыгар түргэн наартаҕа Саха Өрөспүүбүлүкэтин Первенствота буолла. Уопсайа 12 улуус хамаандата, 104 кыттааччы баар. Дьааҥы хамаандата 10 оҕону кытыннарда. Саамай үрдүк көрдөрүүбүтүнэн, Дьааҥыга атах оонньуутугар дьахталларга бастакы уонна соҕотох маастара, эдэр тренер Раиса Горохова иитиллээччитэ, Баатаҕай орто оскуолатын 3 кылааһын үөрэнээччитэ Прудецкая Анджелика 9 уонна онтон кыра саастаах кыргыттарга 254 наартаны ойон 3 миэстэ буолла. 9 уонна онтон кыра саастаах уолаттарга Табалаах орто оскуолатын 2 кылааһын үөрэнээччитэ Эверстов Максим 255 наартаны ойон саҥа саҕалыыр оҕоҕо куһаҕана суох түмүгү көрдөрдө.
Дьааҥы хамаандата үс улахан күрэхтэһии түмүгүнэн, икки кыһыл көмүс, үс үрүҥ көмүс, үс боруонса мэтээли ыламмыт былырыыҥҥытааҕар үчүгэй түмүктээх күрэхтэһиилэрбитин түмүктээтибит. Улуус баһылыгар Владислав Ивановка, улуус физическай култуураҕа уонна спортка начальнигар Станислав Баишевка, ДЮСШ дириэктэригэр Виктор Ощепковка, Табалаах оскуолатын дириэктэригэр Александра Эверстоваҕа уонна оҕолорбут төрөппүттэригэр хамаанда аатыттан махталбытын биллэрэбит.
Дьааҥы хамаандатын бэрэстэбиитэлэ, тренера, Табалаах орто оскуолатын физкультураҕа учуутала Дмитрий Эверстов