Быйыл ахсынньы ый 13-15 күннэригэр Үөһээ Бүлүүгэ Хапсаҕай Федерация 2024 сыллаах Кубогар саас буолбут Петр Алексеев аатынан өрөспүүбүлүкэ чөмпүйэнээтигэр уонна оҕолорго «Эрчимэн Бэргэн» күрэхтэһиитин түмүктэринэн уопсайга 8 көрдөрүүлээх кыттар чиэстэммиппит.
Аан бастаан Үөһээ Бүлүү Хоротугар 2015 сыллаахха буолбут Петр Алесеевка хамаанданан иккис миэстэҕэ тахсан, Федерация Кубогар кыттар чиэстэммиппит,полуфиналга хотторон кыһыылаахтык 4 миэстэлэммиппит. 2016 сылга 8 миэстэ, 2017сылга 8 миэстэ, 2019 сылга 6 миэстэ, 2022 сылга 7 миэстэ буолбуппут.
Быйыл улууспут хамаандатын састаабыгар оҕолорого киирдилэр:
- 50 кг — Егор Ефимов, Арылаах орто оскуолатын 11 кл үөрэнээччитэ, улуус чөмпүйүөнэ.
- 55 кг — Семен Новиков Сартан, Мындаабаҕа 9 кл үөрэнэр.
- 62 кг — Арсентий Юмшанов, Адыаччы орто оскуолатын 10 кл үөрэнээчитэ, быйылгы Эрчимэн Бэргэн призера.
- 70 кг — Василий Готовцев Табалаах, Дириҥҥэ агрооскуолс 9 кл үөрэнээччитэ.
- 80 кг — Спиридон Новгородов Борулаах, Дьокуускай куоракка полиция оскуолатын устудьуона.
- 80 кг үөһээ ыйааһыҥҥа Александр Семенов Верхоянскай куорат 10 кылааһын үөрэнээччитэ, улуус хапсаҕайга, көҥүл тустууга чөмпүйүөнэ.
Бэтэрээннэргэ:
- 60 кг — Боронуктан Александр Другин, «Өбүгэ оонньууларын» хапсаҕайга чөмпүйүөнэ.
- 70 кг — Верхоянскай куораттан Федор Старостин көҥүл тустууга спорт маастарыгар кандитат.
- 80 кг — Баатаҕайтан Иннокентий Слепцов, көҥүл тустууга маастарга кандитат.
- 90 кг — Баатаҕайтан Андрей Тарскай ааспыт нэдиэлэҕэ Томпо улууһун Мэҥэ- Алданыгар Юрий Васильев кэриэһигэр ыытыллыбыт күрэхтэһии үрүҥ көмүс призера.
- 90-тан үөһээ киилэлээхтэргэ Борулаахтан Илья Попов мас тардыһыытыгар Саха сирин спордун маастара, улуус хапсаҕайга чөмпүйүөнэ.
- 57 кг — Элгэстэн Егор Находкин, спорт маастара, Аан дойду чөмпүйүөнээтин үрүҥ көмүс призера,өрөспүүбүлүкэ чөмпүйүөнэ.
- 65 кг — Адыаччыттан Афанасий Слепцов элбэх өрөспүүблүкэтээҕи күрэхтэһии чөмпүйүөнэ уонна призера.
- 75 кг — Адыаччыттан Иван Потапов көҥүл тустууга Арассыыйа спордун маастара, элбэх Арассыыйатааҕы, Аан дойдутааҕы күрэхтэһии призера.
- 85 кг — Суордаахтан Роберт Сидоров, спорт маастара, өрөспүүбүлүкэ түөрт төгүллээх чөмпүйүөнэ.
- 95 кг — Табалаахтан Дьулустаан Попов, спорт маастара, үгүс өрөспүүблүкэтээҕи күрэх кыайыылааҕа.
- 95 кг үөһээ ыйыыһыҥҥа Элгэстэн спорт маастара Алексей Мигалкин, өрөспүүблүкэ үрүҥ көмүс призера.
Хамаанданы салайан илдьиэхтэрэ Александр Неустроев, улуустааҕы спорт салалтатын салайааччыта, Юрий Старостин, хапсаҕайга Саха сирин бочуоттаах маастара, эр дьоҥҥо ст.тренер, Виктор Ощепков, Баатаҕайдааҕы ДЮСШ дириэктэрэ, оҕолорго ст. тренер.
Маны тэҥэ биир дойдулаахтарыгар күүс-көмө буола барыахтара көҥүл тустууга Советскай Союз үс төгүллээх призера Михаил Ноговицын, бочуоттаах ыалдьыт, Станислав Баишев массажист-консультант уонна иккис сылын Дьааҥы хапсаҕайдьыттарын бэйэтин массыынатынан өрөспүүблүкэ араас улуустарыгар тиэйэн илдьэн күрэхтэһиннэрбит Владимир Чириков.
Платон Эверстов